Búgin elordada ótken baspasóz máslıhatynda Ulttyq bank tóraǵasy krıptovalıýta salasy jaıynda sóz qozǵady.
«Ulttyq bank sheshimi keshigip jatyr dep sanamaımyn. Álemdegi basqa da ortalyq bankter men qarjy salasyn retteýshiler sekildi biz de bul máseleni tyńǵylyqty zerttep jatyrmyz. Bul turǵyda ahýal jekeleı ári ortalyqsyzdandyrylǵan qarjyǵa baılanysty bolyp tur. Osy baǵytta bizdi ınnovasııalardyń múmkindikteri qyzyqtyryp otyr. Atap aıtqanda, tek maıner nemese qandaı da bir jeke qurylym qyzyqtyrmaıdy. Bul salada jańa tehnologııalar qamtamasyz ete alatyn ınnovasııalar men jańa múmkindikterdiń mańyzy zor. Sondyqtan bizdiń sheshim turaqtylyq pen qarjy qyzmetterin paıdalanatyndardyń múddelerine teris áserin tıgizbes úshin egjeı-tegjeıli talqylaýdy jalǵastyramyz», dedi Ǵalymjan Pirmatov.
Ol bul másele jan-jaqty zerttelgennen keıin naqty sheshim qabyldanyp, aldaǵy ýaqytta jarııalanatynyn jetkizdi.
«Biz bul naryqty nazardan tys qaldyrmaımyz. Atalǵan tehnologııalar aıasynda usynylyp otyrǵan ınnovasııalar áleýeti boıynsha barynsha paıda tabýdy kózdep otyrmyz», dedi Ulttyq bank tóraǵasy.
