Elorda tórinde ótken is-sharaǵa mádenıet marqasqalary men óner áleminiń darabozdary, memleket jáne qoǵam qaıratkerleri jáne ár sala boıynsha qatarynan oza shaýyp báıge alǵan shyn úzdikter qatysty. Forýmdy quttyqtaý sózimen ashqan Mádenıet jáne sport mınıstri Dáýren Abaev táýelsiz eldiń kók baıraǵy jalyndy jastar men daryndy azamattar arqyly qaı kezde de bıikte jelbireı beretinine senim bildirdi.
«Biz árqashan Týymyz ben Ánuranymyzdy, Eltańbamyzdy maqtan tutamyz. Árqashan aspan tústes kók baıraǵymyz azattyǵymyzdy aıqyndap turady. Árqaısymyzdyń júregimizde jattalǵan Ánuranymyzdyń qasıetti sózderi álemdi jańartatyn jetistikterge jetelep, jigerlendirsin. Eltańbamyz árqashanda Qazaq memleketiniń joǵary bedeliniń belgisi bolsyn! Bul zalda elimizdiń ozyq oıly, jasampaz jastary bas qosyp otyr. Men Sizderdiń memlekettik rámizderge degen aıryqsha qasterli qarym-qatynastaryńyzdyń negizinde elge degen zor maqtanysh, Otanǵa degen sheksiz súıispenshilik jáne shynaıy halyq birligi turǵanyna kámil senimdimin», dedi Dáýren Abaev forýmǵa qatysýshylarǵa arnaǵan quttyqtaý sózinde.
Forým aıasynda birneshe sala boıynsha úzdik shyqqandar arnaıy atalymdarmen marapattaldy. Aıtalyq, «Ǵylym jáne bilim» atalymy boıynsha bilim berý zertteýleriniń Eýropalyq Assosıasııasynyń Eýropalyq baıqaýynyń jeńimpazy Ashat Jumabekov, fızık, L.N.Gýmılev atyndaǵy EUÝ zerthana jetekshisi, fızıka-matematıka ǵylymdarynyń kandıdaty Maksım Zdoroves jeńistiń bıik tuǵyrynan kórinse, «Mádenıet jáne sport» atalymy boıynsha Qytaı astanasy Beıjiń qalasynda ótken qysqy Paralımpıada oıyndarynda qola júldeger atanǵan parabıatlonshy Aleksandr Gerlıs jáne belgili teleprodıýser, ssenarıst, «Maska» shoýynyń qazaqstandyq nusqasyn efırge shyǵarǵan Gúlnur Mamasarıpova júldege laıyq dep tanyldy. Sondaı-aq, «Medısına jáne volonterlik» atalymy boıynsha QazCovid-in (QazVac) koronavırýs ınfeksııasyna qarsy qazaqstandyq vaksınany ázirleýshi Kúnsulý Zakarııa men erikti Abylaıhan Ábdirashtyń juldyzy jandy. «О́nerkásip jáne aýyl sharýashylyǵy» atalymy boıynsha kásipker Beıbit Asanov pen Amanjol Áripov, «Tehnologııa jáne bıznes» nomınasııasy boıynsha О́rken Mamyrbaev pen Sabyrjan Aqbarov, «Erekshe erlik kórsetken azamattar» atalymy boıynsha gvardııashy, Aqtóbe qalasyndaǵy qańtar oqıǵasy kezinde Otan aldyndaǵy boryshyn abyroımen oryndap, erliktiń eren úlgisin kórsetken Ulan Myrzabaı men segizinshi qabattan qulaǵaly turǵan úsh jasar qyzdy qutqaryp qalǵan Sábıt Shontaqbaev jeńimpaz atandy.
Patrıottar forýmynda sóz alǵan Sábıt Shontaqbaev óziniń áreketin erlikke telimeıtinin jetkizdi. «Ardaqty baýyrlar, dostar! Barshańyzdy osy basqosýda kórgenime qýanyshtymyn. Kórsetken qurmet úshin aıtar alǵysym sheksiz. Áıtkenmen men óz áreketimdi erlik dep eseptemeımin. Ondaı jaǵdaıda kez kelgen adam qol ushyn beredi. Sondyqtan da osy jerde otyrǵan barshańyzdy patrıottar dep esepteımin», dedi ol óz oıymen bólisip.
Patrıottar forýmynda top jarǵan azamattardyń barlyǵy da memlekettik rámizder kúnine qatysty aqjarma tilekterin aqtardy. Is-shara sońy konserttik baǵdarlamaǵa ulasty.
