Djeıms Djonsonmen áńgimelesý barysynda Qasym-Jomart Toqaevqa korporasııanyń elimizde atqaryp jatqan jumystarynyń qazirgi nátıjeleri men aldaǵy kezeńge arnalǵan jospary týraly málimet berildi. Atap aıtqanda, Teńiz ken ornyn bolashaqta keńeıtý jobasy boıynsha qurylys-montaj jumystaryn tezirek aıaqtaý máselesi sóz boldy.
Sonymen qatar Qarashyǵanaq ken ornynyń óndiris qýatyn arttyrý máselesi, Qazaqstanda otandyq ónimderdi qoldaýǵa jáne qorshaǵan ortany qorǵaýǵa baǵyttalǵan Chevron korporasııasynyń tikeleı ınvestısııa salatyn qorynyń qyzmeti talqylandy.
Nıl Chapman Memleket basshysyna Qarashyǵanaq ken ornyndaǵy gaz óńdeý zaýyty qurylysynyń barysy, Teńiz ken ornynan eksporttalatyn gaz kólemin ishki naryqqa qaıta tasymaldaý jáne balama baǵyttar arqyly Qazaqstan munaıyn jetkizý múmkindikteri jóninde aıtty.
Tımotı Gıtselmen jáne Don Strıýmen áńgimelesý kezinde Qazaqstanda birlesken ınvestısııalyq jobalardyń júzege asyrylý barysy sóz boldy. Atap aıtqanda, Cameco kompanııasynyń prezıdenti Qasym-Jomart Toqaevqa elimizdegi ýran kompanııasynyń jumysy men aldaǵy jospary jóninde málimet berdi. Condor Petroleum kompanııasynyń prezıdenti suıytylǵan tabıǵı gaz óndiretin modýldi zaýyttar salý jospary jóninde málimet berdi. Sonymen qatar «Qazaqstan – Kanada» iskerlik keńesiniń jumysy aıasynda Qazaqstan men Kanada arasyndaǵy yntymaqtastyqty damytýdyń perspektıvalaryna nazar aýdaryldy.
