Bul keshte mýzykalyq ónerde ózindik qoltańbasy qalyptasqan jas ártister, halyqaralyq baıqaýlardyń laýreattary óner kórsetti. Konserttiń shymyldyǵy qazaq mýzyka ónerine jańa tynys ákelgen «Saz&soul» tobynyń ánimen ashyldy.
Toptyń súıemeldeýimen sahnada Gúlsim Myrzabekova, Álibek Álmádıev Saltanat Meńdiǵalıeva, Erbolat Narımanuly, Erbol Tájibaev, Rýhııa Baıdúkenova, Gúlnár Kóshenova, Dıdar Ábdýhalyq syndy belgili ánshiler, halyqaralyq baıqaýlardyń laýreattary men elimizge tanymal «Melomen» toby óner kórsetti.
Ánshilerdiń oryndaýyndaǵy halyq ánderi, jańa avtorlyq týyndylar men zamanaýı óleńder óner súıer qaýymnyń zor yqylasyna bólendi. Saltanatty is-shara ár kórermenge merekelik kóńil-kúı syılap qana qoımaı, týǵan elge, táýelsizdiktiń sımvoly – rámizderge degen patrıottyq sezimin ushtaı tústi.
«Roza Baǵlanova atyndaǵy «Qazaqkonsert» memlekettik konserttik uıymynyń baspasóz qyzmeti málimdegendeı, Memlekettik rámizderdiń 30 jyldyǵyna arnalǵan merekelik konsertter maýsym aıynyń sońyna deıin jalǵasady. Aldaǵy ýaqytta kórermender «Astana Musical» teatrynyń «Roza Baǵlanova», «Shańyraq», «Dostar serti» mıýzıklderin, «Halyq qazynasy» óner bóliminiń ártisteri usynatyn «Án-kúı qanatynda», «Syrly ánder – syrlasym» konsertterin tamashalaı alady.
