Ortalyqtyń tehnıkalyq ashylýyna qatysqan oblys ákimi О́mirzaq Shókeev sportshylar men jattyqtyrýshylardy quttyqtady. «Eýropa reıtıngisiniń chempıondyq kestesinde kósh bastap kele jatqan Zańǵar Nurlanuly keleshekte Djokovıch, Nadal sekildi tennıs juldyzyna aınalady dep senemiz. Osy tennıs ortalyǵynda aldaǵy ýaqytta respýblıkalyq, halyqaralyq jarystar ótip turady. Jasóspirimder men jastarymyz, tennıssúıer qaýym osynda sheberlikterin shyńdaıdy», dedi О́mirzaq Shókeev. Slovakııada ótken Tennis Europe serııasynyń Baseline Open U14 ekinshi sanatty týrnıriniń chempıony jáne ózge de dodalardyń jeńimpazy atanyp júrgen jas tennısshi Zańǵar Nurlanuly túrkistandyqtarǵa jyly lebizin bildirdi. «Sporttaǵy eń alǵashqy qadamymdy 4 jasymda Túrkistan óńirinde bastaǵam. Sportta eń bastysy – jaýapkershilik. Tynymsyz shyńdalý, aldyńa maqsat qoıý arqyly ǵana jeńiske jetýge bolady. Kúnine 4 saǵat jattyǵamyn. Túrkistanǵa eki jyl buryn kelgem, qazir ózgerip ketipti», deıdi Zańǵar. Tennis Europe uıymynyń Monte-Karlo qalasynda bıyl kúzde ótetin Junior Masters jarysyna oraı jańartylǵan reıtınginde Zańǵar Nurlanuly 520 upaımen birinshi orynda tur. Suhbattarynyń birinde Zańǵar «Úlken dýlyǵa» týrnırin utý – armany ekenin aıtqan bolatyn.
Túrkistandaǵy tennıs ortalyǵynyń syrtqy fasad jumystary men ınjenerlik jelileri, ákimshilik ǵımaratynyń 1,2 qabattarynda ishki árleý jumystary tolyq aıaqtalǵan. Ortalyqta 11 tennıs korty, kórermenderge arnalǵan jınalmaly minbeler, ámbebap oıyn alańy, balalar oıyn alańy jáne avtoturaǵy bar.
TÚRKISTAN
