Dıplomat Qazaqstan bıznes úshin básekege qabiletti orta qurýǵa erekshe nazar aýdaratynyn aıtty. Jahandyq básekege qabilettilik reıtıngisin mysalǵa keltirdi. Aıta ketsek, onda Qazaqstan 35-shi orynǵa ıe boldy.
«Dúnıejúzilik banktiń sońǵy esebine qaraǵanda, Qazaqstan bıznes júrgizý boıynsha 190 eldiń ishinde 25-shi orynda. Men buryn aıtyp ótken qarjylyq jáne ekonomıkalyq turaqtylyqtan basqa, el túrli salalarda jan-jaqty memlekettik qoldaý usynady. Biz korporatıvti tabys salyǵynan, jer salyǵynan, múlik salyǵynan bosatý jáne fıskaldyq emes yntalandyrý: jer ýchaskesi men ınfraqurylym sııaqty salyqtyq jeńildikterdi qamtıtyn ınvestısııalyq jobalarǵa qoldaý kórsetemiz», dedi Asqar Jumaǵalıev.
Dıplomat ınfraqurylym men ınvestısııalyq preferensııalardyń keń spektrin usynatyn búkil Qazaqstan boıynsha ornalasqan 13 arnaıy ekonomıkalyq aımaq pen 36 ónerkásiptik aımaq týraly toqtala ketti.
Onyń aıtýynsha, Qazaqstanda Eýrazııalyq ekonomıkalyq odaq elderin, Qytaı men Kaspıı basseınin qosa alǵanda, mıllıardtan astam tutynýshylardyń naryqqa tikeleı qoljetimdiligi bar. Sondaı-aq elde kólik ınfraqurylymy jaqsy damyǵan.
«Nıderland Qazaqstandaǵy birinshi nómirli sheteldik ınvestor dep oılaımyn. Patshalyq bizdiń elge 105 mıllıard dollardan astam ınvestısııa saldy», dep túıindedi ol.
Koroldik klýb músheleri preferensııalardan basqa, kadr máseleleri, aǵylshyn tilin meńgerý deńgeıi, Qazaqstannyń klımattyq erekshelikteri jáne elde júrgizilip jatqan reformalar týraly alańdady.
Sonymen qatar Asqar Jumaǵalıev jýyrda elimizde ótken referendým, ony ótkizý nátıjeleri men Konstıtýsııaǵa engiziletin túzetýlerge ákep soqtyratyn ózgerister týraly da habardar etti.
