«Tutastaı alǵanda, zań jobasynda 7 Zań men 2 Kodekske túzetýler kózdelgen. Olar energııa únemdeý jáne energııa tıimdiligin arttyrý salasyndaǵy zańnama normalaryn jetildirýge, otynnyń balamaly túri retinde gazdy paıdalana otyryp, generasııalaıtyn qondyrǵylardy salýmen qosa jańǵyrtýǵa, rekonstrýksııalaýǵa ári keńeıtýge ınvestısııalardy qaıtarý tetigin engizýge baǵyttalǵan. Sonymen qatar taqtatas munaıyn óndirýdi damytý, shekara bólimsheleri men memlekettik shekara arqyly ótkizý pýnktterin salý jónindegi máselelerdi sheshý eskerilgen», dep túsindirdi Indýstrııa jáne ınfraqurylymdyq damý mınıstri Qaıyrbek О́skenbaev.
Onyń aıtýynsha, energııa únemdeýdiń negizgi baǵyttary - bul Memlekettik energetıkalyq tizilim, energııa aýdıti, memlekettik baqylaý, bıýdjettik sektor jáne óńirlik saıasat.
«Elimizdiń energııa tutynýynyń úshten bir bóligin qamtıtyn iri kásiporyndarda energııa únemdeý boıynsha jaýapty tulǵalardy engizý, sondaı-aq barlyq energııa tizilim sýbektileriniń 90%-ǵa jýyǵyn tutynatyn TOP-100 kásiporyn úshin energııa tıimdiligi boıynsha nysanaly ındıkatorlardy belgileý usynylady», dedi mınıstr.
Energııa únemdeýdiń eleýli áleýetine ıe bıýdjet sektoryn retteýdi kúsheıtý maqsatynda kelesi sharalar kózdelgen:
- memlekettik mekemelerde energııa tutynýdy azaıtýdy qamtamasyz etetin, sondaı-aq energııa tutynatyn jabdyqtyń qazaqstandyq naryǵyn qaıta qurýǵa serpin beretin energııa tıimdi memlekettik satyp alýdy engizý;
- energııa tutyný normatıvterin belgileý, olardy saqtaý monıtorıngi, benchmarkıng jáne energııa tıimdiligi boıynsha tıisti usynymdar berý usynylady.
