Atap aıtqanda, búgin Senat «QR Keıbir zańnamalyq aktilerine elektr energetıkasy, energııa únemdeý jáne energııa tıimdiligin arttyrý, jer qoınaýyn paıdalaný, jergilikti memlekettik basqarý jáne memlekettik shekara máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady. Qujat aıasynda Almatyǵa qatysty tıisti sheshimder eskerilgen.
«Almaty qalasyna qatysty túzetýleri boıynsha qala qurylysy keńesin engizý jáne qalanyń dızaın-kodyn qabyldaý usynylady. Bul megapolıs problemalaryn sheshý ári qala turǵyndarynyń ómir súrý jaǵdaılaryn jaqsartý boıynsha kelisilgen qala qurylysy saıasatyn júrgizýge múmkindik beredi. Sondaı-aq biryńǵaı sáýlettik kelbet berýdi qamtamasyz etedi», dedi Q. О́skenbaev.
Sonymen qatar ol múlikti zańdastyrý problemalaryn sheshý úshin jyljymaıtyn múlikti resimdeý máselelerin qaraý jónindegi komıssııa qurý usynylyp otyrǵanyn aıtty.
«Azamattardyń qaýipsizdigin qamtamasyz etý úshin menshik ıeleriniń kelisimi bolǵan jaǵdaıda, azamattar kóp jınalatyn jerlerde beınekameralar ornatý jáne beınebaqylaý monıtorıngin júrgizý qaǵıdalaryn bekitý usynyldy. Bul megapolıs aýmaǵyn beınemonıtorıngpen barynsha qamtýdy qamtamasyz etýge múmkindik beredi», dedi vedomstvo basshysy.
