• 23 Sáýir, 2014

Aqparattar aǵyny

264 ret

kórsetildi

2 mın

oqý úshin

Egemen Qazaqstan

● «QazAgro» 2014 jylǵy kóktemgi dala jumystaryna 61,6 mlrd. teńge bóledi. Keshe taratylǵan baspasóz paraqshasynda munyń 40 mlrd. teńgesi bıýdjettik nesıe ekeni aıtylǵan. Budan basqa, ulttyq kompanııa alǵash ret egis jumystaryna ekinshi deńgeıli bankter arqyly 20 mlrd. teńge qarjy qarastyrady. ● Almaty qalasynyń mańynda jańa áýejaı boı kóteredi. Bul týraly Almaty oblysy ákiminiń orynbasary Amandyq Batalov málimdedi. Onyń aıtýynsha, jańa áýe qaqpasy úshin ońtústik astanadan 54 shaqyrym jerdegi Jetigen kenti mańynda 2 myń gektarǵa jýyq jer telimi belgilenip qoıylǵan. ● Ońtústik Qazaqstanda qýattylyǵy 12 MVt kún energııasy stansasy salynady. «Qazatomónerkásip» UAK» AQ basqarma tóraǵasynyń keńesshisi Azat Betekbaevtyń málimdeýinshe, qazir joba boıynsha jumystar bastalyp ketken. Aımaqtaǵy áleýmettik nysandarda 4 stansanyń jobalaý jumystary jasalýda. ● Shyǵys Qazaqstan oblysy Reseı et eksportyn 200 tonnaǵa deıin jetkizedi. Qazirgi tańda aımaqta 44 myń bas iri qarany semirtip jatqan 276 mal bordaqylaý alańy osyǵan úles qosady. Al mal bordaqylaýshylar memleket tarapynan úlken qamqorlyqqa ıe. Olar ótken jyly qazynadan 5 mlrd. teńgeden astam sýbsıdııa aldy. ● Keshe Kókshetaýda klassıkalyq jáne halyq mýzykasynyń II festıvali sóreden shyqty. Márege erteń jetetin «Kókshetaý - tal besigim» atty bul óner merekesine Qazaqstanmen qatar, Reseı jáne Italııa elderiniń kóptegen tanymal sheberleri qatysyp jatyr. ● Búgin Qyzylorda qalasynda Aqtóbe oblysynyń kúnderi bastaldy. Sáýirdiń 23-27 kúnderi aralyǵyn qamtıtyn mádenı sharada meımandar «Alaqaı» qýyrshaq teatrynyń mýltı-shoýyn, sýretshilerdiń kórmesin, oblystyq fılarmonııanyń gala-konsertin usynady. Delegasııa ókilderi sonymen qatar, Jalaǵash, Qazaly jáne Aral aýdandaryn aralaıdy. ● Atyraýda tozyǵy jetken páterler ornyna jańasy beriletin boldy. Qalada aldaǵy 7 jyl ishinde ótken ǵasyrdyń basynda salynǵan 80 úı syrylyp, olardyń 2 myńǵa jýyq turǵyny basqa qonystarǵa kóshiriledi. ● Qostanaı oblysynda kópqabatty úılerdi jóndeýge 670 mln. teńgeden astam qarjy qaraldy. Bul týraly aıtqan oblys ákiminiń birinshi orynbasary Evgenıı Aman alǵash ret Taran aýdany Tobyl kentiniń páterleri jóndeletinin, oblys ortalyǵyndaǵy 18 úıdiń jumystaryna 323,5 mln. teńge jumsalatynyn jetkizdi. BNews.kz, Alau.kz, Altaynews.kz, Egemen.kz aqparlary, oblystyq ákimdikter saıttary boıynsha daıyndaldy.