Jeńiske tabandylyq jetispedi

Buǵan deıin jazǵanymyzdaı, ÝEFA sheshimi boıynsha Belarýs quramasy bıylǵy Ulttar lıgasynyń óz alańyndaǵy oıyndaryn Serbııanyń soltústiginde ornalasqan shaǵyn qaladaǵy beıtarap alańda ótkizýge májbúr. Oǵan álemde bolyp jatqan saıası jaǵdaı tikeleı áser etip otyr. Sonymen qatar ÝEFA Bela­rýs quramasymen ótetin kez kelgen oıynǵa jankúıerlerdiń de kirýine qatań tyıym salǵan.

ÝEFA-nyń tyǵyz kúntizbesine sáı­kes ár eki-úsh kún saıyn match ótkizip jatqan quramalarǵa atalǵan týrnırdiń bıylǵy maýsymy óte qıynǵa soǵyp jatqany aıtpasa da túsinikti. Degenmen túrli ke­dergilerge qaramastan, Qazaqstan qu­ra­masynyń fýtbolshylary ár týr saıyn óz jankúıerlerin nátıjeli oıynymen qýantyp keledi. Elordadaǵy alǵashqy týrda Ázerbaıjan (2:0) quramasy men ekinshi týrda syrt alańda Slovakııany (1:0) san soqtyrǵan Mogamed Adıev shákirt­teri jumadan senbige qaraǵan túni Qazaqstan úshin alynbas qamalǵa aınalǵan Belarýs fýtbolshylarymen teń oınady. Eki eldiń quramalary búginge deıin resmı matchta tórt márte kezdesip, sonyń barlyǵynda Belarýs quramasynyń mereıi ústem bolǵan edi.

Ulttyq quramaǵa bas bapker bolyp taǵaıyndala salysymen jankúıerlerdiń narazylyǵyna ushyraǵan Magomed Adıev ár match saıyn mańyzdy sheshimimen jan­kúıerlerdi de, fýtbol mamanda­ryn da qýantyp jatyr. Máselen, Ázer­baı­janmen bolǵan oıynda alańǵa bes birdeı qorǵaýshyny shyǵarsa da, eki qap­taldaǵy eki qorǵaýshyny jıi shabýylǵa aralastyrdy. Slovakııadaǵy oıynda negizinen qorǵanysqa kóbirek kóńil bóldi. Al Belarýspen bolǵan oıynda taǵy da alǵashqy týrdyń taktıkasyn ustanyp, birinshi mınýttan bastap shabýylǵa den qoıdy.

Novı-Sadtaǵy nóserli jaýyn match jyl­damdyǵyna, oıyn barysyna aı­tarlyqtaı keri áserin tıgizdi. Kezde­sýdiń alǵashqy 10 mınýtynda eki el­diń fýtbolshylary da kógildir ekranǵa kóz tikken kórermenderdi eleń etkizetindeı birde-bir qaýipti shabýyl uıymdastyra almady. Tek 13-mınýtta Abat Aıymbetovtiń golynan keıin ǵana oıyn jandana bastady. Sol qaptaldan Iаn Vorogovskııdiń áýelete asyrǵan pasyna birinshi jetken Aıymbetov baspen kezekti golyn soqty. Bul – Abattyń alǵashqy úsh oıyndaǵy úshinshi goly. Osy nátıjesiniń arqasynda ol Ulttar lıgasynyń surmergender qataryna qosyldy.

Arada bes mınýt ótkende alań qo­jaıyn­darynda esepti teńestiretin tamasha múmkindik bolǵan edi. Alaı­da jańbyrdan keıingi alańnyń taıǵa­naqtyǵy bizge ájeptáýir kómektesti. Al oıynnyń 34-mınýtyndaǵy qarymta shabýyl kezinde ulttyq quramanyń debıýtanty Elhan Astanov gol soǵatyn urymtal sátin múlt jiberip aldy.

Úzilisten keıin Qazaqstan qura­ma­synda esepti eseleıtin, Belarýs fýtbolshylarynda tarazy basyn teńestiretin birneshe múmkindik boldy. Keı sátte shabýylshylardyń tepken doby qaqpadan qıys ketse, endi birde qorǵaýshylar men qaqpashylar qyraǵylyq tanytty. Alaıda matchtyń aıaqtalýyna bes mınýt qalǵanda Belarýs fýtbolshylary buryshtamadan gol soǵyp, esepti teńestirdi. Goldyń avtory – Vladıslav Mılvevıch. Matchtyń sońǵy mınýttarynda Mılvevıch dýbldiń avtory atanýy múmkin edi. Biraq shabýylshynyń tepken doby qaqpa baǵanyna tıip, alań syrtyna shyǵyp ketti. Osylaısha, Qazaq­stan quramasy óz tarıhynda alǵash ret Belarýs fýtbolshylarymen teń oınady – 1:1. Al bizdiń toptaǵy ekinshi oıyn­da Ázerbaıjan quramasy óz alańynda Slovakııany qabyldap, 0:1 esebimen jeńilip qaldy. Qonaqtardyń jeńis golyn oıynnyń 81-mınýtynda «Qaırattyń» burynǵy slovakııalyq bas bapkeri Vla­dımır Vaısstyń uly Vladımır Vaıss soqty.

Úshinshi týr oıyndarynan keıin Ulttar lıgasynyń «S» dıvızıonyndaǵy úshinshi toptyń týrnır kestesinde 7 upaı jınaǵan Qazaqstan quramasy áli de jeke-dara kósh bastap keledi. Ekinshi orynǵa 6 upaı jınaǵan Slovakııa quramasy jaıǵasty. Al qorjynynda 2 upaıy bar Belarýs úshinshi, 1 upaıy bar Ázerbaıjan tórtinshi orynǵa turaq­taǵan.

Jerlesterimiz kelesi kezdesýin búgin «Astana Arenada» Slovakııa qura­ma­symen ótkizedi. Oıyn elorda ýa­qytymen 20:00-de bastalady. Aıta keteıik, bul oıynǵa Qazaqstan qurama­sy­nan eki sary qaǵazy bar Islambek Qýat, al qonaqtar sapynan jaraqatyna baı­­la­nys­ty komanda kapıtany Mılan Shkrınıar qatysa almaıdy.