WBO beldigin sátti qorǵady

Jergilikti Adal Promotions kompa­nııasynyń uıymdastyrýymen ótken Aqtaýdaǵy dúbirli dodanyń basty aı­qa­synda Meıirim Nursultanov pen ar­gentınalyq Sebastıan Orasıo Papeskı sharshy alańǵa shyqty. 30 jastaǵy Papeskı 2014 jyldan beri kásipqoı boksta baq synap keledi. Ol búginge deıin 21 jekpe-jek ótkizip, onyń 18-inde qarsylasyn qapy qal­dyrǵan. Tek úsh kezdesýinde ǵana jeńilistiń kermek dámin tatqan. Argen­tınalyq boksshy karerasyndaǵy 21 aıqastyń 20-syn óz elinde ótkizgen bolsa, byltyr alǵash ret shetelde judy­ryqtasty. Panamada ótken boks keshinde ol meksıkalyq qarsylasyn upaı sanymen jeńip ketti. Sheteldegi ekinshi kezdesýin Qazaqstanda ótkizgen Sebastıan Orasıo bul joly sátsizdikke ushyrap, tájirıbeli otandasymyzdan ońbaı jeńildi.

Orta salmaqtaǵy WBO International beldigi sarapqa salynǵan Aqtaýdaǵy aıqas áýelde 10 raýndqa josparlanyp, kezdesý nebári besinshi raýndta máresine jetti. Birinshi raýndtan bas­tap jekpe-jek tizginin óz qolyna alǵan Nursultanov qarsylasyn besinshi úsh mınýttyqta kesken terekteı sulatyp saldy. Argentınalyq bir buryshtan kelesi buryshqa sheginip bara jatyp otan­dasymyzdyń hýk soqqysyn ótkizip aldy. Meıirimniń oń qolymen jasaǵan joıqyn soqqysynan keıin Sebastıan Ora­sıo uzaq ýaqyt esin jııa almaı, tóre­shi jekpe-jekti merziminen buryn toqtatty.

Osylaısha, Meıirim Nursultanov aqpan aıynda jeńip alǵan orta sal­maqtaǵy WBO International bel­beýin alǵash ret sátti qorǵady. Bul – otan­dasy­myzdyń kəsipqoı bokstaǵy 17-shi jeńisi. 2016 jyldan beri kəsip­qoı rıngte judyryqtasyp kele jatqan Meıi­rim osy ýaqyt aralyǵynda 16 mərte sharshy alańǵa kóterilip, barly­ǵynda jeńiske jetti. Toǵyz bəsekesin merziminen buryn aıaqtaǵan edi.

Əýesqoılar arasyndaǵy əlem chempıony Bekzat Nurdəýletov kəsipqoı rıngtegi besinshi kezdesýin qazaqstandyq boksshy Mıhaıl Kohanchıkpen (4-1, 4 KO) ótkizdi. Áýesqoı boksta da bir-bi­rimen judyryqtasqan eski tanys­tar bul joly kásipqoı sharshy alańda qolǵap túıistirdi. Eki boks­shy 2017 jylǵy boks­tan Qazaqstan chem­pıonatynyń jar­tylaı fınalynda jolyǵyp, kezdesý Bekzattyń jeńisimen aıaqtalǵan edi. Bul jolǵy aıqasta da Nurdáýletovtiń mereıi ústem boldy. Segiz raýndqa jos­parlanǵan jekpe-jek­te Bekzat tóre­shilerdiń biraýyz she­shimimen jeńiske jetti.