Kollajdy jasaǵan Amangeldi Qııas, «EQ»
El ómirindegi mańyzdy máselelerdi talqylaıtyn alqaly jıyn alǵash ret uıymdastyrylǵaly otyr. Memleket basshysynyń 16 naýryzdaǵy halyqqa arnaǵan Joldaýynan keıin qurylǵan bul konsýltatıvtik-keńesshi organnyń quramyna Parlament depýtattary, Qazaqstan halqy Assambleıasynyń, azamattyq qoǵam men saıası partııalardyń ókilderi, kásipkerler men bilikti sarapshylar, sondaı-aq qoǵamdyq keńes músheleri kiredi. Ulttyq quryltaıdyń aldyna qoıǵan eń mańyzdy mindetteriniń biri – qoǵamdyq birigýdi odan ári damytý boıynsha ıdeıalar usynyp, naqty qadamdar jasaý.
Esterińizde bolsa, Joldaýda Prezıdent Ulttyq quryltaı qurý týraly bastama kóterip, bul jóninde «Babalarymyz el taǵdyryn aıqyndaıtyn tarıhı sheshimderdi búkil halyq bolyp aqyldasyp, birge qabyldaǵan. Ulytaýda, Ordabasy men Kúltóbede ótken uly basqosýlar – sonyń aıqyn dáleli. Keleli jıynda aıtylǵan kesimdi sózge alty Alashtyń balasy túgel toqtaǵan. Biz birliktiń bastaýy bolǵan osy dala demokratııasynyń dástúrin jańǵyrtýymyz kerek», degen edi.
Demokratııalyq jolmen damýdy tańdap, Ádiletti, Jańa Qazaqstan qurýǵa bet alǵan elde ulttyń birligin saqtaý máselesi eń aldyńǵy qatarǵa shyǵatyny sózsiz. Al bul maqsatty júzege asyrýdyń naqty joldary men mehanızmderi osy alqaly basqosýda aıtylary haq.
Ulttyq quryltaıdyń alǵashqy jıyny ult uıasy – Ulytaýda ótetini jaıly Prezıdent Qasym-Jomart Toqaev Konstıtýsııaǵa ózgerister men tolyqtyrýlar engizý jónindegi referendýmnan keıin Qazaqstan halqyna úndeýinde aıtty. «Qasterli táýelsizdigimizdi, el birligin jáne qoǵamdyq kelisimdi nyǵaıtý – bizdiń negizgi mindetimiz. Bul reformalar qur ataq-abyroı úshin qolǵa alynǵan joq. Munyń bárin Jańa, Ádiletti Qazaqstan qurý úshin jasap jatyrmyz. Halqymyzda «Keńesip pishken ton kelte bolmaıdy» degen sóz bar. Babalarymyz mańyzdy máseleni alqaly jıynda sheshken. Men osy dástúrdi jańǵyrtyp, Ulttyq quryltaı qurý týraly bastama kóterdim. Oǵan qoǵamnyń túrli top ókilderi, bedeldi ári belsendi azamattar shaqyrylady», dedi Memleket basshysy.
«Ulytaý – halqymyzdyń el bolyp qalyptasýyna, birlik-tirligine dińgek bolǵan, ıisi qazaqtyń aınalyp soǵar túp qazyǵyndaı qasıetti meken. Ulytaý qazaqtyń erte kezdegi saıası ortalyǵy retinde mańyzdy bolǵandyǵyna bir dálel qazaq ulysynyń negizin qurǵan basty-basty taıpalardyń barlyǵynyń jeri osy Ulytaýdan taraǵan». Bul – áıgili akademık Álkeı Marǵulannyń kıeli meken týraly jazbasy. Qart tarıh qazaq eliniń halyq bolyp qalyptasýynyń túp-tórkini osy Ulytaýdan bastaý alatynyna kýá. Endeshe, alǵashqy Ulttyq quryltaıdyń osynaý qasıetti mekennen bastaý alǵany da tarıhı zańdylyq bolar.
Ulytaýda ótetin Ulttyq quryltaı otyrysyna túrli top ókilderi, bedeldi ári belsendi azamattar qatysady dep josparlanyp otyr. Sondaı-aq Memleket basshysy Qasym-Jomart Toqaev maýsymnyń 17-si kúni Reseı Prezıdenti Vladımır Pýtınniń shaqyrýymen Peterbor halyqaralyq ekonomıkalyq forýmynyń 25-mereıtoılyq jıynyna qatysady.
Memleket basshysy Forýmnyń plenarlyq otyrysyna qatysyp, birqatar ekijaqty kezdesý ótkizedi dep josparlanǵan. 15-18 maýsymda ótkiziledi dep bekitilgen XXV Peterbor halyqaralyq ekonomıkalyq forýmynyń iskerlik baǵdarlamasy dástúrli túrde jahandyq jáne reseılik ekonomıka máselelerine, áleýmettik máseleler men tehnologııalardy damytýǵa arnalady.
Prezıdenttiń baspasóz qyzmeti jarııalaǵan Memleket basshysynyń osy aptadaǵy jumys kestesine sáıkes 19 maýsymda Qazaqstan Prezıdenti Iran Islam Respýblıkasynyń Prezıdenti Ibrahım Raısıdiń shaqyrýymen Iranǵa resmı saparmen barady. Tegeranda joǵary deńgeıde ekijaqty kezdesýler ótkizý jáne birqatar úkimetaralyq qujatqa qol qoıý josparlanyp otyr.
