Jaqynda Jetisý oblysyndaǵy belsendi qaýymmen kezdesken Premer-Mınıstr Álıhan Smaıylov oblystyń jańa basshysyna basqarý organdary men memlekettik mekemelerdiń turaqty jumysyn qalyptastyrýdy mindettegen edi. Úkimet basshysy sondaı-aq jańa ınvestısııalyq jobalardy iske asyrý, jańa jumys oryndaryn keńinen ashý kerektigin de basa aıtty.
Reti kelgende biz Úkimet basshysy atap ótken Taldyqorǵan qalasyndaǵy ındýstrıaldy aımaqtyń qazirgi jaı-kúıin tilge tıek etpekpiz. Jalpy, «Taldyqorǵan» ındýstrıaldy aımaǵynyń aýmaǵy 594,9 gektar jerdi alyp jatyr eken. 2016 jyly qazyǵy qaǵylǵan aımaqtyń qurylys jumystaryn kezeń-kezeńge bólip júrgizý josparlanǵan bolatyn. Munda qazir ınjenerlik júıeler tartylyp, qajetti jumystyń basym bóligi aıaqtalǵan. Al ındýstrıaldy aımaqtyń qurylysyna respýblıkalyq bıýdjetten 2,9 mlrd teńge qarajat bólingen bolatyn. Búginde ınvestorlardyń alǵashqy legi óz óndiris oryndaryn osy aımaqqa kóshirip, jumysyn bastap ketken. Iаǵnı osy sátte «Taldyqorǵan» ındýstrıaldy aımaǵynyń aýmaǵynda 6 kásiporyn ornalasty. Mundaǵy óndiriste tórt júzdeı adam jumys isteıdi. Taǵy 3 ınvestısııalyq joba qolǵa alynyp jatqan kórinedi.
Solardyń qatarynda jaqynda oblys ákimdigimen kelisimshartqa qol qoıǵan «TK «Gazoblok» kompanııasy men «Almplast» seriktestiginiń jobalary bar. Memorandým aıasynda qurylys salasyndaǵy 5 jańa joba qolǵa alynbaq. Máselen, «TK «Gazoblok» kompanııasy Ile aýdanynda 3 zaýyt, Taldyqorǵanda 1 zaýyt salýǵa nıetti. Bul kásiporyndar gazbloktar, sement panelderdiń talshyqtaryn, shyny maqtalaryn shyǵaratyn bolady. Jobalar jeti jylǵa josparlanǵan. Shamamen 26 mlrd teńge ınvestısııa tartylyp, 240 jumys orny ashylady.
– Biz shyǵaratyn qurylys materıaldary negizinen syrt elderden ákelinedi. Qysqasha aıtqanda, ımportqa táýeldi. Sondyqtan biz ishki naryqtyń suranysyn otandyq ónimdermen tolyqtyrýdy maqsat etip otyrmyz, – deıdi «TK «Gazoblok» kompanııasynyń bas dırektory Maksım Kım.
Al «Almplast» JShS «Taldyqorǵan» ındýstrıaldy aımaǵynda dıametri 20-
1 200 mm plastık qubyrlar shyǵaratyn óndiris ornyn ashady. Joba 2022-2023 jyldary iske asyrylady. Tartylatyn ınvestısııa kólemi – 2,6 mlrd teńge shamasynda, nátıjesinde, 37 jumys orny qurylady. Jobanyń jyldyq qýaty – 16,8 myń tonna. Bul jobalar qurylys ındýstrııasynyń damýyna jańa serpin berip, el naryǵyna otandyq qurylys materıaldaryn kóptep shyǵarýǵa úles qospaq.
Jalpy, Taldyqorǵan qalasy boıynsha ınvestorlardy tartý jumysy áli de jandandyrýdy qajet etedi eken. Iаǵnı oblys ortalyǵynda kásipkerlikti damytý jónindegi ulttyq joba men «Bıznestiń jol kartasy» aıasynda kásipkerlerge qoldaý kórsetý jumysyn kúsheıtý birinshi mindet bolyp otyr. Onyń ústine, byltyr Taldyqorǵan boıynsha shaǵyn jáne orta bızneste jumys isteıtinder sany men bıýdjetke quıylatyn salyq túsimi azaıǵan. Al Taldyqorǵan óńirin jáne qalany damytý josparlaryna sáıkes 2025 jylǵa deıin 14 myń jumys ornyn quratyn 1,8 trln teńgege 316 ınvestısııalyq jobadan turatyn pýl qurylǵan. Sonyń ishinde Taldyqorǵan óńirinde 6,6 myń jumys orny bolatyn jalpy somasy 1 trln teńgelik 186 jobany iske asyrý kózdelip otyr. Bıyldyń ózinde qalada ınvestısııa somasy 7,8 mlrd teńgeni quraıtyn, 281 jumys orny ashylatyn 5 joba iske qosylady dep boljanǵan. Biraq 200 myńǵa jýyq turǵyny bar qala úshin bul jetkiliksiz ekeni anyq.
Jetisý oblysy
