Sóıte tura qalany da jaman demeıdi: «Almaty degen ǵajap qoı» dep sumdyq tańǵalyp otyra beredi. Astananyń taksıshileri sekildi saıasatty soqpaıdy. Olardy saılaý da, referendým da qyzyqtyrmaıdy. Eshkimdi dattamaıdy, eshteńe suramaıdy. Kóppen qosylyp Elbasyn da jamandamaıdy. Bárine peıili oń.
О́zin kishkentaı adamǵa balaıtyn, jyltyraǵan jaqsy ómirge tura júgirmeıtin, aýyldaǵy mıtyń tirshiligine dán rıza osyndaı jandarda qarapaıymdylyqtan da kúshti bir minez bar.
Úlken qalalardaǵy ómirdiń ǵajap ekenin estigen biz álgi adamnyń aq adal, ańǵal peıiline rıza bolyp turyp jylaǵymyz keledi. Qaladaǵylarǵa, kerisinshe, keıde qym-qýyt tirshilikten túý alystaǵy ómir tynysh, jyly kórinedi. Aýylda ýaqyt baıaý ótetindeı, ómir uzaǵyraq bolatyndaı. Jaqsy ómir, tek qalada degen jaqsy adamnyń ertegisi ǵoı. Munda bári jumys isteý úshin ómir súredi. Keıde báriniń minezi bir-birine uqsaıtyndaı kórinedi: salqyn qabaq, tomaǵa-tuıyq, samarqaý. Eshkimniń qoly bos emes, báriniń júıkesi juqarǵan. Bári túrli trenıngke barady. Bul qalada baılar da, olıgarhtar da, sheneýnikter de, qarapaıym halyq ta turady. San túrli taǵdyr úlken dańǵyldar men kóshelerde bir-birine juǵyspaı, qıylyspaı zýlap ótip jatady.
Al aýyl eshqaıda asyqtyrmaıdy, janyńdy jumsartady, bálkı minezińdi de. Qalanyń qatqyl, jarqyl tirshiligine úırengen adam da biraýyq aýyldy saǵynady. Balalyǵy úshin, estelikteri men sezimderi úshin, sáýleli sátteri úshin. Tańnan keshke deıingi keńse jumysynan jalyqqanda kóńiliń shalǵaıdaǵy qońyr tamǵa aýady. Maldyń daýsy, qıdyń ıisi, aýa jaıylǵan tútin, ár úıdiń irgesindegi maıa shóp, jamaý qoranyń janynda jotadaı úıilgen keptirilgen qı, dáý qara qazan, daladaǵy qotyr pesh, saryala samaýryn – bári-bári qatyp-semgen júregińdi jylytatyndaı.
Alaıda qazir kóp aýyldarda mundaı kartına bolmaýy da múmkin. Shalǵaıdaǵy aýyldar da qalalanyp jatyr. Báriniń úıinde ystyq sý aǵady, gaz kirgen. Eshkim mıtyńdap kúl shyǵarmaıdy. Ákimderi sıvılızasııaǵa «ádeıi» jetkizbeı júrgen aýyldar bolmasa (elimizde mundaı mekender kóp), qalǵan óńirde jol da jasalǵan, ınternet te bar. Aýyl men qalany teńestirý saıasaty, bálkı durys ta shyǵar. Degenmen, birshama jyldardan keıin qalalyqtar aýylǵa baryp aýyldy tappaı qalmaı ma degen oıǵa qalasyń. Endi bir jaǵynan, qaladaǵy jaǵdaı aýylda da bolatyn bolsa, nege aýylǵa baryp turmasqa deıtinder de tabylady. Taza aýa hám tabıǵat.
Qanttyń baǵasy 750 teńge bolǵaly jalpy Qazaqstanda ómir ózgerdi: qalada da, aýylda da turmys máz emes. Qymbatshylyq jalaqysy tómen halyqty qysyp barady. Eń qyzyǵy, aýyldaǵylar qaladaǵylardy baı dep oılaıdy. Al qalalyqtar aýylda ómir súrý arzan deıdi. Keı jurt bizdi – jýrnalısterdi de shalqyp ómir súredi dep júr eken. Adamnyń ańǵaldyǵynan asqan jaqsy minez joq shyǵar, sirá. Bizdiń de bir «kedeı» ekenimizdi olar qaıdan bilsin...
