«Aılyq ınflıasııa sáýirdegi 2%-ǵa jáne naýryzdaǵy 3,7%-ǵa qaraǵanda mamyrda 1,4%-ǵa baıaýlady, biraq áli de joǵary jáne ótken jylǵy kórsetkishter men ortasha jyldyq mánderden asyp otyr. Aılyq ınflıasııanyń baıaýlaý qarqyny bir jaǵynan oń fıskaldyq ımpýls aıasyndaǵy turaqty ishki suranysty, ekinshi jaǵynan joǵary ınflıasııalyq kútýlerdi kórsetedi.
Jyldyq mánde 19%-ǵa jetken tamaq ónimderi baǵasynyń ósýi eń kóp úles qosyp otyr. Syrtqy ınflıasııalyq jaǵdaı azyq-túlikke jatpaıtyn taýarlardyń baǵasyna joǵary qysym kórsetip otyr, olardyń ósýi 11,1-den 11,9%-ǵa deıin qarqyn aldy», dedi Ǵalymjan Pirmatov.
Onyń aıtýynsha, aqyly qyzmetterdiń ınflıasııasy retteletin qyzmetter baǵasynyń ósýine engizilgen moratorııdiń tejeýshi áserine qaramastan 8,9-dan 9,1%-ǵa deıin ósken.
«Ulttyq bank 2022 jyldyń sońynda ınflıasııa 13-15% deńgeıinde bolady dep boljaıdy. Boljam tutyný naryqtarynyń teńgerimdi damýyna nazar aýdarylatyn Úkimettiń ınflıasııa deńgeıin baqylaý jáne tómendetý jónindegi sharalar keshenin iske asyrý barysy eskerile otyryp jasaldy. Osy sharalar kesheni tabysty iske asyrylǵan kezde ınflıasııa boljamnyń tómengi shegine deıin tómendeýi múmkin.
Azyq-túlikke jatpaıtyn taýarlar baǵasynyń ósýi birshama jedeldeıdi. Ol janar-jaǵarmaı baǵasy retteletin ósimmen tejeledi. Aqyly qyzmetterdiń ınflıasııasy 2021 jyldyń joǵary bazasyna baılanysty báseńdeıdi. Retteletin kommýnaldyq qyzmetter baǵasynyń olardy kóterýge moratorıı aıaqtalǵannan keıin qymbattaý táýekelderin, sondaı-aq joǵary ınflıasııalyq kútýler aıasynda naryqta kórsetiletin qyzmetter baǵasynyń ósýin atap ótemiz.
2023 jyly ınflıasııa aqsha-kredıt saıasaty salasynda qabyldanyp otyrǵan sharalar, syrtqy ınflıasııalyq qysymnyń birtindep tómendeýi jáne iske asyrý josparlanyp otyrǵan kontrsıkldik bıýdjettik qaǵıda aıasynda birtindep 7,5-9,5%-ǵa deıin baıaýlaıdy.
Ulttyq bank táýekelderdiń qazirgi balansyn eskere otyryp, bıylǵy 6 maýsymda bazalyq mólsherlemeni 14% deńgeıinde saqtady. Jańa shoktar bolmaǵan jaǵdaıda bazalyq mólsherlemeniń qazirgi deńgeıin saqtaý orta merzimdi perspektıvada baǵanyń ósýin tejeýge áser etedi», dedi Ulttyq bank tóraǵasy.
