Granttyq qarjylandyrý konkýrsyna qujat qabyldanyp jatyr

Ǵylym qory janyndaǵy Jobalyq dıreksııasynyń dırektory Manat Keldibekov keıingi jyldary elimizde belgili bir kommersııalyq áleýeti bar perspektıvalyq jobalardyń pýly qalyptasqanyn jetkizdi.

«Bizdiń qor 2018 jyldan bas­tap ǵylymı jáne ǵylymı-teh­nıkalyq nátıjelerdi qar­jy­landyrý konkýrsyn uıym­dastyryp keledi. Osy ýaqyt ishinde elimizde belgili bir kom­mersııalyq áleýeti bar pers­pek­tıvalyq jobalardyń pýly qalyptasty. Otandyq ǵylymı ázirlemelerge negizdelgen úzdik ınnovasııalyq taýarlar men qyzmetter memlekettik qoldaýǵa ıe bolyp, qarjylandyrylady jáne eksportqa shyǵarylady. Ǵalymdar óz jobalaryn júze­ge asyrý úshin 300 mln teńgege deıin qarjy ala alady. Sondaı-aq ǵylymı jobalar tek Qa­zaq­stan aýmaǵynda engizi­le­di», dedi M.Keldibekov.

Konkýrsty uıymdastyrýshy uıymnyń málimdeýinshe, jobalar ekonomıkanyń densaýlyq saqtaý, sapaly bilim berý, sıfr­lan­dyrý, geologııalyq barlaý, ener­getıkalyq keshendi jań­­­ǵyrtý, óńdeý ónerkásibi, mu­naı-hımııa ónerkásibi, ekologııa, agroónerkásiptik keshen, metallýrgııa, metall óńdeý, týrızm jáne t.b. sııaqty salalardy qamtıdy. Granttyq konkýrsta ashyqtyq pen transparenttilikke baǵyttalǵan jańashyldyqtar bar. Kommersııalandyrý jónin­degi arnaıy qurylǵan ulttyq keńestiń ókilderi qarjy bólý úshin jobalardy irikteıdi. Onyń quramyna jetekshi ǵalym­dar, venchýrlyq bıznestiń, salalar­dyń ókilderi, ınnovasııa sala­syn­daǵy sarapshylar kiredi. Keńes Úkimet qaýlysymen beki­ti­ledi.

Baıqaý talaptaryna sáı­kes joba 3 jyl ishinde aıaq­talyp, satylymǵa shyǵýy kerek, al qosa qarjylandyrý grant somasynyń keminde 20%-yn quraýǵa tıis. Ko­mandalar quramynda 5 adam­ǵa deıin qatysa alady.

О́tinishterdi qabyldaý bastalyp ketti, bul 5 shildege deıin júrgiziledi. О́tinishterdi «Ulttyq memlekettik ǵyly­mı-tehnıkalyq saraptama orta­lyǵy» AQ avto­mat­­tan­dy­rylǵan aqparattyq jú­ıesi, ıaǵnı www.is.ncste.kz siltemesi arqyly jiberýge bolady. Qajetti qujattar tizimi Ǵylym komıtetiniń (www.gov.kz/memleket/entities/sc?lang=ru), «Memlekettik ult­tyq ǵylymı-tehnıkalyq sarap­ta­ma ortalyǵy» AQ (www.ncste.kz/ru/competition) jáne Ǵylym qorynyń (www.science-fund.kz) veb-saıttarynda orna­las­tyrylǵan.