«Ulttyq qoǵamdyq senim keńesi óz jumysyn aıaqtaǵanymen onyń negizgi músheleri Ulttyq quryltaı quramyna kirdi. Memleket basshysy jańa qurylym jaıynda alǵash ret naýryzdaǵy Joldaýynda málimdegen bolatyn. Ulttyq quryltaı ne úshin quryldy? Ol qoǵamnyń birigýin nyǵaıtý jáne keńeıtýge ıdeıalar men qadamdar izdeý ári ázirleý úshin dıalog platformasyna aınalýdy maqsat tutady», dep jazdy Erlan Qarın óziniń Telegram arnasynda.
Memlekettik keńesshi Ulttyq quryltaıdyń Ulttyq qoǵamdyq keńesten qandaı aıyrmashylyǵy baryn aıta ketti.
«Eger Ulttyq qoǵamdyq senim keńesindegi pikirtalas taqyryby aǵymdaǵy áleýmettik-ekonomıkalyq problemalar, saıası reformalar máselesi bolsa, al Ulttyq quryltaıda talqylaý taqyryby jalpyulttyq qundylyqtar negizinde qoǵam birigýiniń odan ary damı túsýine qatysty uzaqmerzimdi sıpattaǵy máseleler bolady», dep jazdy Erlan Qarın.
Ol Ulttyq quryltaı quramyna engen birqatar tanymal tulǵalardy atady.
«Búgin Qasym-Jomart Toqaev Ulttyq quryltaı qurý týraly Jarlyqqa qol qoıyp, onda onyń erejesi men quramy bekitildi. Jańa qoǵamdyq ınstıtýttyń músheleri qatarynda mynadaı tanymal tulǵalar bar: tanymal kompozıtor, jazýshy, Qazaqstannyń Eńbek eri Ilııa Jaqanov; Qazaqstannyń halyq jazýshysy, aqyn, qoǵam qaıratkeri Muhtar Shahanov; qazaqtyń tuńǵysh ǵaryshkeri, Keńes odaǵynyń batyry, Halyq qaharmany Toqtar Áýbákirov; tanymal jýrnalıst ári qoǵam qaıratkeri Seıdahmet Quttyqadam; kórnekti ǵalym-matematık, akademık Asqar Jumadildaev; iri ekonomıst jáne qoǵam qaıratkeri Jaqsybek Kúlekeev; tanymal memleket qaıratker, saıasatker Álıhan Báımenov; jýrnalıst, medıa-menedjer, qoǵam qaıratkeri Ermurat Bápı; memleket jáne qoǵam qaıratkeri, Parlamenttiń birneshe shaqyrylymynyń depýtaty Nurtaı Sabılıanov; álem chempıony, Seýl olımpıadasynyń kúmis júldegeri, qoǵam qaıratkeri Dáýlet Turlyhanov; ǵalym-bıotehnolog, «QazVac» vaksınasyn ázirleýshi Kúnsulý Zakarııa; qoǵam qaıratkeri, dintanýshy Qaırat Joldybaı; tanymal tilshi-ǵalym Anar Fazyljanova; ekolog, azamattyq belsendi Azamat Ámirtaev. Sonymen qatar Qazaqstanǵa tanymal ózge de tulǵalar kirdi. Ulttyq quryltaıdyń quramynda jalpy 117 qatysýshy bar», dep jazylǵan habarlamada.
