Almatydaǵy Qyzdar memlekettik ýnıversıteti aldyndaǵy sýburqaq osylaı atalady
Sáýir kelip, kún raıy táýirlene bastaǵannan-aq, barsha baıyrǵy oqý oryndar kezegimen Ulystyń uly kúnin atap ótýde. Osylardyń ishindegi ózgeshesi – Qazaq memlekettik qyzdar pedagogıkalyq ýnıversıtetinde «Qazaq arýy» eskertkish-sýburqaǵy ashylyp, oǵan Almaty qalasynyń ákimi Ahmetjan Esimov arnaıy qatysty.
Bıyl 70 jyldyǵyn atap ótýge jan-jaqty daıyndalyp otyrǵan Qyzdar ýnıversıtetindegi taǵy bir jaǵymdy jańalyqtyń biri – 9 qabatty, 450 oryndyq jataqhana boı kótermek. Qala ákimi osy oqıǵaǵa da ortaqtasyp, óz qolymen jataqhana irgetasyndaǵy qurylys taǵanyna «Dúnıeniń tiregi – tekti tárbıe, tereń bilim» degen taǵylym tilek jazylǵan qutyny ornalastyrdy.
Al ýnıversıtettiń oqý-jataqhanalary ornalasqan ǵımarattarynyń dál ortasynda ulttyq kıimdegi qazaq qyzynyń músini boı kóterdi. Qyzdar ýnıversıtetiniń kórigine kórik qosqan sýburqaqtyń bıiktigi 5 metrden asady. Sýburqaq aınalasyna qazaq jáne álem oıshyldarynyń danalyq sózderi jazylǵan 12 kitap ornatylǵan. Eskertkish tuǵyry bilezik pishinimen aıaqtalady. Ulttyq naqyshta, stýdentter boıynda rýhanı ádemilik pen rýhanı qundylyqtarǵa degen yntyzarlyqty arttyrý maqsatynda salynǵan sýburqaq mármárdan jasalǵan.
Sýburqaq-eskertkishtiń avtory – músinshi Nurlan Buharbaev eskertkishte qazaq qyzynyń bolashaqqa degen umtylysyn beıneleýge ónerin salypty.
Almaty qalasy ákiminiń Naýryz merekesinde qyzdarǵa taǵy bir syıy – sýburqaq aınalasyna shyrsha aǵashtaryn ekti. Tal egýdiń sońy toıǵa ulasyp, saltanatty jıynda Ahmetjan Esimov:
– ...Osy ýnıversıtetke kelgen saparynda Elbasy N.Á.Nazarbaev «Bir qyzdy tárbıeleý – bir ultty tárbıeleýmen birdeı» degen bolatyn. Bul – Qyzdar ýnıversıtetine berilgen úlken baǵa.
Qazaq memlekettik qyzdar pedagogıkalyq ýnıversıteti – táýelsiz Qazaqstanymyz ben TMD aýmaǵyndaǵy tek arýlarǵa joǵary bilim beretin oqý ordasy bolyp tabylady. 70 jyldyq tarıhy bar, ózindik dara bitimimen erekshelenetin bilim oshaǵy joǵary sapaly pedagog daıyndap qana qoımaı, oqý ornyn bitirip shyqqan ár qazaq qyzyna ónegeli tárbıe berip, qyzdardyń baǵyt alar baǵdarshamy bolyp kele jatqan kıeli shańyraǵyna aınaldy.
Qala ákimi búginde túlekteriniń sany 60 myńǵa jýyq ýnıversıtetten shyqqan elge belgili tulǵalardyń esimderin atap, óz jarynyń da Qazaq memlekettik qyzdar pedagogıkalyq ýnıversıtetiniń túlegi ekendigin aıtyp ótti.
Ulystyń uly kúnine oraı uıymdastyrylǵan shara merekege ulasyp, konserttik baǵdarlamada ýnıversıtettiń maqtanyshtaryna aınalǵan halyqaralyq jáne respýblıkalyq baıqaýlardyń laýreaty «Tomırıs» bı ansambli, elimizge áıgili «Aıgúl» ansambli, respýblıkaǵa tanymal «Ular» folklorly-etnografııalyq ansambli jáne taǵy basqa jas ónerpazdar óner kórsetti.
Aınash ESALI,
«Egemen Qazaqstan».
ALMATY.
