Aqmola oblystyq Tótenshe jaǵdaılar departamentiniń málimetinshe, qaıǵyly oqıǵa 14 maýsymda saǵat 19:39-da Arshaly aýdany Jibek Joly aýylynyń Silk Way demalys aımaǵynda bolǵan.
«2010 jyly týǵan qyz ata-anasynyń qaraýynsyz qalyp, sýǵa shomylýǵa jabdyqtalmaǵan jerde batyp ketti», delingen TJD habarlamasynda.
Shaqyrtý ornyna jetken Nur-Sultan qalalyq TJD Jedel-qutqarý jasaǵynyń qutqarýshylary qyzdyń denesin saǵat 20:58-de taýyp, sýdan shyǵardy.
Aıta ketý kerek, osy jyldyń 21 mamyrynda demalys aımaǵynyń sý qoımasyna tekserý júrgizilip, shomylýǵa jaramsyzdyǵy týraly akt berildi. 28 mamyrda bólim qyzmetkerleri Silk Way demalys aımaǵynda qutqarý beketiniń sý aıdynyndaǵy qaýipsizdik qaǵıdalarynyń negizgi talaptaryn túsindirý jáne demalys aımaǵyn jabdyqtaý boıynsha profılaktıkalyq jumystar júrgizdi. Sýǵa shomylýǵa jáne balalardy sý aıdynynda qaraýsyz qaldyrýǵa tyıym salý týraly aqparattyq stend ornatyldy.
Aqmola oblysynyń TJD sýdaǵy qarapaıym tártip erejelerin saqtaýdy eske saldy.
«Tekserilmegen jáne jabdyqtalmaǵan jerlerde sýǵa túspeńiz. Júzýge arnalmaǵan zattarmen júzbeńiz, sýǵa alkogoldik nemese esirtkilik mas kúıinde kirmeńiz. Eger siz sý aıdynynda balalarmen birge bolsańyz olardy qaraýsyz qaldyrmańyz. Júzý quraldaryn paıdalana otyryp balyq aýlaý kezinde mindetti túrde qutqarý keýdeshelerin paıdalanyńyz. Sýdaǵy qaýipsizdik erejelerin saqtamaý qaıǵyly nátıjelerge ákep soqtyrýy múmkin ekendigin umytpańyz», dedi TJD ókilderi.
