ASTANA FORÝMY TURAQTY DAMÝǴA JOL AShPAQ

Astana qalasynda 1-2 shildede “Daǵdarystan keıingi kezeńdegi turaqty ekonomıkalyq ósim” atty ekonomıkalyq úshinshi forým óz jumysyn bastamaq. Bıylǵy jyly álemniń elý memleketinen keletin saıası jáne isker ortanyń eki myńnan astam ókilderin jınaıtyn úshinshi ekonomıkalyq forým qarsańynda Almatyda osy iri sharaǵa arnalǵan baspasóz máslıhaty bolyp ótti. Baspasóz máslıhatyna qatysqan el Prezıdentiniń kómekshisi Baqyt Sultanov Qazaqstan astanasynda jyl saıyn ótkiziletin dástúrli forýmnyń kún tártibindegi ózekti másele – álemdik daǵdarystan keıingi turaqty damý tóńireginde sóz qozǵady. Onyń aıtýynsha, Asta­na ekonomıkalyq forýmynyń mańyzdylyǵy ýaqyt ótken saıyn arta túsýde, onyń ózindik sebepteri de bar. Bıylǵy forýmǵa qatysý­shy­lardyń arasynda Nobel syı­lyǵynyń úsh birdeı laýreatynyń bolýy da kóp nárseden habar berse kerek. Ekonomıkalyq máselelerdi ortaǵa salatyn iri forým Memleket basshysynyń bastamasymen dúnıe­ge kelgen. Bul oraıda, Sankt-Pe­terbýrgte 2007 jyly ótken ekono­mı­kalyq forýmda Prezıdent ǵa­lymdardyń Eýrazııa ekonomıkalyq klýbyn qurý týraly bastama kóte­rip, sol klýbtyń tildestik alańy Astana ekonomıkalyq forýmy bolǵandyǵyn atap aıtý qajet. Baqyt Sultanov baspasóz más­lıhatyna jınalǵandarǵa Astana ekonomıkalyq úshinshi forýmynyń negizgi erekshelikteri jóninde jan-jaqty baıandap berdi. – Sheteldik kásipkerler men ónerkásipshiler jáne ózge de salalardyń basshylary qatysatyn iskerlik forýmy Astana ekonomı­kalyq forýmyndaǵy úlken oqıǵaǵa aınalady dep kútilýde. Bul bas­qosýdaǵy basty maqsat – Eýrazııa keńistiginde ózara saýda-ekono­mı­kalyq baılanystar jáne ınves­tı­sııalyq yntymaqtastyqty keńeı­týge baǵyttalǵan iskerlik kongresin qurý bolyp tabylady. Taǵy bir atap aıtatyn jáıt, úshinshi forým  “G 20”-nyń bıyl ótetin eki sam­mı­tiniń aralyǵynda ashylmaq. Any­ǵyraq aıtqanda, “G 20”-nyń bir sammıti – Torontoda, al ekin­shisi Seýl qalasynda ótiledi dep josparlanýda. Jıynda álemdik daǵdarystan keıingi áleýmettik-eko­nomıkalyq qaýipsizdikti qamta­ma­syz etýdiń ózekti máseleleri talqylanbaq, – deıdi Baqyt Turlyhanuly. Forýmǵa qatysýshylardyń arasynda EQYU Bas hatshysy Mark Perren de Brıshambo, Eko­nomıkalyq yqpaldastyq jónindegi uıymnyń bas hatshysy, Aýǵanstan prezıdenti keńesshisi Muhammad Maarýfı jáne Eýropa ortalyq banki, Azııa Damý banki, iri ın­ves­tısııalyq kompanııalar jáne ózge de iri uıymdar ókilderi bar. Jıyn sheńberinde daǵdarystan keıingi retteý jaǵdaıynda ıslamdyq qarjylandyrýdy retteý tetikterine arnalǵan halyqaralyq ǵylymı konferensııa uıymdastyrylady. Memleket basshysynyń kómek­shisi Astanadaǵy ekonomıkalyq úshinshi forým aıasynda ınnovas­ııa­lyq tehnologııalardy damytýda ma­ńyzdy ról atqaratyn ınnovasııa­lyq kongress ótkiziletindigin de habarlady. Ulttyq ınnovasııalyq ekonomıkany damytýdyń ozyq tájirıbesimen jáne Ortalyq Azııa elderi men Qazaqstanda ınnovasııa­lyq saıasattarǵa arnalǵan usynys­tarymen Fınlıandııa, Norvegııa, Germanııa, Koreıa, Fransııa jáne Izraıl elderiniń ınnovasııalar jáne tehnologııalar jónindegi memlekettik qurylymdarynyń ókilderi oı bólispek. Sonymen qatar, atalǵan is-shara aıasynda ındýstrııalyq-ınnovasııalyq jobalar men ǵylymı eńbekter kórmesi de uıymdastyrylady. Baqyt BALǴARINA, Almaty.