Dala demi

Bıyl Qyzylorda oblysynda 160,4 myń gektar jerge egis egiledi. Sonyń 76,6 myń gektary kúrish daqylyna tıesili. Buıyrtsa, dıqandar osy aptada kúrish egýdi bastaıdy. Bul týraly búgin oblys ákimi Qyrymbek Kósherbaevtyń tóraǵalyǵymen ótken májiliste aıtyldy. Kúrish egisine qajetti 20  myń tonna tuqym qambada daıyn tur. «QazAgroEks» AQ Qyzylorda oblystyq fılıalynyń málimeti boıynsha búgingi kúnge 17,7 myń tonna tuqym tekserýden ótkizilip, onyń 13895 tonnasyn dál qazir ege berýge bolady. Mıneraldy tyńaıtqyshtarǵa kelsek, sońǵy málimet boıynsha, sharýashylyqtar 21,2 myń tonna ammonıı sýlfaty, 8808 tonna karbamıd, 120 tonna amıak selıtrasy, 5790 tonna ammofos, 129 tonna sýperfosfat, 1011 tonna fosforıt uny tyńaıtqyshtaryn alǵan. Mamandar bıyl sý tapshylyǵy bolmaıtyndyǵyn aıtyp otyr. Aldyn ala jasalǵan boljamdar boıynsha, daqyldardy turaqty sýarýǵa ortasha 4-4,1 mıllıard tekshe metr sý qajet. Dál osyndaı kólemdegi sý Shardarada bar. Qazirgi ýaqytta Shardara sý qoımasynan sekýndyna 700 tekshe metr sý jiberilýde. 2014 jyldyń kóktemgi dala jumystaryna 1805 traktor, 250 tuqym sepkish, 490 soqa, 956 traktor tirkemesi jáne 415 avtokólik jumyldyrylady. Tehnıkalar búginde saqadaı-saı tur. Oblystyń aýylsharýashylyq daqyldaryn egip, kútip-baptaý jumystaryn ýaqtyly júrgizýge 14 myń tonna dızel otyny, 2,8 myń tonna benzın jáne 840 tonna qoıý maı qajet. Munaı óńdeý zaýyttarynan oblysqa dızel otynyn jetkizýshi 12 operator belgilendi. Olardyń tórteýi ózderin ózderi qamtamasyz etetin sharýashylyqtar bolsa, qalǵan 8 operator aýdan sharýashylyqtaryna dızel otynyn jetkizip beredi. Qazirgi ýaqytta sharýashylyqtar kóktemgi dala jumystaryna qajetti suıyq otynmen tolyq qamtylǵan. Erjan BAITILES, «Egemen Qazaqstan». QYZYLORDA.