47 túp aǵash otyrǵyzylady

2 mamyrda Astanada Azııa damý banki Bas­qarý­shylar keńesiniń 47-shi jyl saıynǵy májilisi óz jumysyn bastaıdy. Osyǵan oraı 30 sáýirde elordada Azııa damý bankiniń (ADB) prezıdenti Takahıko Nakaonyń jáne ADB májilisiniń tóraǵasy – Ekonomıka jáne bıýdjettik josparlaý mınıstri Erbolat Dosaevtyń qatysýymen 47 aǵash otyrǵyzylǵan jańa alleıa ashylady. Sonymen birge Azııa damý banki jumysynyń basym baǵyttarynyń biri ekologııany saqtaý bolǵandyqtan, jıyn bolatyn Táýelsizdik saraıynda qaldyqtardy qaıta óńdeýge arnalǵan jáshikter qoıý, forýmǵa qatysýshylardy ekologııalyq taza sómkelermen qamtamasyz etý, sondaı-aq, otandyq taýar óndirýshiler ónimderi men qazaq mádenıeti men óneriniń kórmesin uıymdastyrý josparlanǵan. Azııa damý banki Basqarý­shy­lar keńesiniń 47-shi májilisi – «Azııany aýyspaly álemde biriktiretin jańa jibek joldary» dep atalady. Qazirdiń ózinde Qazaqstanda Jibek jolyn jańǵyrtý boıynsha keshendi jumystar qolǵa alynýda. Bas keńsesi Manıla (Fılıppın) qalasynda ornalasqan Azııa damý bankiniń maqsaty aımaqtyq ıntegrasııa jáne túgel qamtıtyn ekonomıkalyq ári ekologııalyq turaqty ósim arqyly Azııa-Tynyq muhıty aımaǵynda kedeıshilik deńgeıin qysqartý bolyp tabylady. Atalǵan uıym 1966 jyly quryldy, 67 múshe-memleketter onyń aksıoneri sanalady. Qazaqstan uıymǵa 1994 jyldan beri múshe. Búgingi kúni kólik, energetıka salalaryn, memlekettik basqarý júıesin jetildirý, jekemenshik sektordy damytý máseleleri boıynsha yntymaqtastyq jolǵa qoıylǵan. Qazirgi kezde Qazaqstan tehnıkalyq qaıtarymsyz kómek alýshy emes, kerisinshe, damýshy elderge járdemdesý boıynsha ADB áriptesi bolýǵa nıetti. Aıtalyq, 2013 jyly ADB Qazaqstanmen yntymaqtastyq aıasynda Azııa damý qoryna donorlyq kómek retinde 5 mıllıon dollar qarjy bólgen. «Egemen-aqparat».