Ulttyq ádebı syılyq jeti atalym boıynsha beriledi. Atap aıtsaq, «Úzdik proza», «Úzdik poezııa», «Úzdik drama», «Úzdik kórkem aýdarma», «Úzdik balalar ádebıeti», «Úzdik komıks» jáne «Kitaptyń úzdik dızaıny». Baıqaý júldegerlerine 5 mıllıon teńgeden qarjylaı syılyq tabystalady. Sondaı-aq jeńimpaz avtorlardyń eńbekteri 500 danamen jaryq kóredi.
Mádenıet jáne sport mınıstri D.Abaev bul jobanyń mindeti ádebıetshilerdi qoldaý ǵana emes, sonymen qatar jazýshylyq ónerdiń aıryqsha áleýmettik mańyzdylyǵyn qoǵamǵa kórsetý ekenin atap ótti.
«Basty maqsatymyz – tól ádebıetimizdi tyń dúnıelermen tolyqtyryp, ony jańasha bıikke kóterý, sondaı-aq ultymyzdyń ádebı murasyn molaıtyp, otandyq ádebıetke jańa serpin berý. Bul syılyqtyń taǵy bir ereksheligi – úzdik dep tanylǵan shyǵarmalar basyp shyǵarylyp, kitaphanalarǵa taratylady. Qatysýshylardyń jasyna, eńbek janryna, jazý tiline shekteý joq. Eń bastysy – shyǵarma mazmundy, ózekti bolýǵa tıis. Qysqa bolǵanymen eldiń esinde qalyp, jurtshylyqtyń aýzynan túspeıtindeı týyndy jazsa, báıge soǵan buıyrady», dedi mınıstr.
Sondaı-aq ol jańa jobanyń otandyq kitap shyǵarý isi men ádebıetti qoldaý baǵytynda júzege asyryp jatqan is-sharalardyń biri ǵana ekenin de aıtty.
«El Prezıdenti belgilep bergendeı, bizdiń túpki maqsatymyz – oqıtyn ult qalyptastyrý. Ol úshin biz «Jańa qazaq ádebıeti» serııasyn qosa alǵanda, jas avtorlardy qoldaýdyń jańashyl tetikterin quryp, memlekettik sýbsıdııalaý kólemin ulǵaıtyp jatyrmyz. Granttar men syılyqtar jarııalap, kitap jármeńkelerin ótkizip kelemiz. Bolashaqta proza, poezııa jáne dramatýrgııadaǵy eń myqty jas talanttardy qoldaý jáne tabıǵı qabiletin shyńdaýǵa arnalǵan «Ádebı zerthana» ashýdy josparlap otyrmyz», dedi D.Abaev.
Aıta keteıik, bıyl bastaý alatyn «Jańa qazaq ádebıeti» serııasy boıynsha buryn esh jerde jaryq kórmegen jas avtorlardyń týyndylary iriktelip, 3 myń tırajben basylyp shyǵarylady.
Mınıstrdiń aıtýynsha, keler jyldan bastap Mádenıet jáne sport mınıstrligi qazaqstandyq jas jazýshylar men aqyndar úshin Prezıdenttiń arnaıy ádebı syılyǵyn taǵaıyndaýdy kózdep otyr.
«Aıboz» ádebı syılyǵy tyń týyndylardyń ómirge kelýine dańǵyl jol ashady dep senemiz. Jalpy, Eýropada bolsyn, Amerıkany alaıyq, damyǵan elderdiń kóbinde kórkem shyǵarma aıryqsha baǵalanady. Keńes dáýirinde de aqyn-jazýshylarymyzdyń oı eńbekterine qalamaqy jaqsy tólendi. Jalpy, shyǵarmashyl qaýymdy yntalandyrý arqyly biz kórkem oılaı alatyn, rýhanı dińgegi berik, aıtar oıy tereń jas urpaq qalyptastyramyz. Ulttyq ádebıetke salynǵan búgingi ınvestısııa – erteńgi bolashaq kepili», dep atap ótti mınıstr.
Sondaı-aq alqaly jıynda taǵy bir tyń joba – danabala.kz portaly iske qosylatyny da aıtyldy. Bul portalda balalarǵa arnalǵan shyǵarmalar jarııalanady.
Aıta keteıik, ádebı syılyqqa otandyq qalamgerler qatysa alady. Usynylatyn eńbekter 15 maýsymnan bastap 1 qazanǵa deıin qabyldanady. Al ádebı syılyq jyl sońynda tapsyrylady.
