Birlesken josparǵa qol qoıyldy

Májiliste palatanyń vıse-spıkeri, «Nur Otan» partııasy parlamenttik fraksııasynyń jetekshisi Darıǵa Nazarbaevanyń tóraıym­dyǵymen fraksııa tóralqasynyń keńeıtilgen májilisi ótti.  Kún tártibinde nurotandyq májilismenderdiń Ulttyq kásipkerler palatasymen birlesken jumysy talqylandy. «Nur Otan» fraksııasy Elbasy, partııa Tóraǵasy Nursultan Nazarbaevtyń shaǵyn jáne orta bıznesti qoldaý týraly bastamasyna oraı, kásipkerler palatasyna birlesken is-qımyl josparyn qurý týraly usynys jasaǵan bolatyn. Parlamentshiler men kásipkerler bul qujat bıznes salasyn damytý jolyndaǵy túıtkildi máselelerdi júıeli túrde sheshýge jáne fraksııa men bıznes-qaýymdastyq arasyndaǵy ózara is-qımyl amaldary men naqty tetikterdi ázirleýge múmkindik beretinine senimdi. Keńeıtilgen jıyn barysynda Májilis vıse-spıkeri, parlamenttik fraksııa jetekshisi Darıǵa Nazarbaeva men Ulttyq kásipkerler palatasynyń basqarma tóraǵasy Abylaı Myrzahmetov Birlesken jumys Josparyna qol qoıdy. Aldaǵy ýaqytta májilismender men kásipkerler qurylys, jer qoınaýyn paıdalaný salalarynda kásipkerlik qyzmetti damytýǵa baǵyttalǵan  qoldanystaǵy zańnamalarǵa ózgerister engizý boıynsha birlesken jumys tobyn qurýdy mejelep otyr. Sondaı-aq, josparda dýaldi bilim berý, ofsettik saıa­sat, ınjınırıng jónindegi zań jobalary boıynsha da birlese jumys atqarý kózdelgen. Sonymen qatar, kapıtaldy zańdastyrý, salyqtyq ákimshilendirý salasynda «bıznes-klımatty» jaqsartý, memlekettik-jekemenshik áriptestigin damytý zań jobalaryna qatysty da usynystar ázirlenedi. Josparly jumystardy júzege asyrý úshin fraksııanyń, «Nur Otan» partııasy Ortalyq appara­tynyń, fraksııa janyndaǵy keńestik-jınalystyq organdardyń, «Úkimet saǵattarynyń», parlamenttik tyńdaýlardyń, sondaı-aq, «Nur Otan» partııasynyń máslıhattardaǵy fraksııalarynyń múmkindigi keńinen paıdalanylatyn bolady. «Egemen-aqparat».