Kún tártibindegi birinshi másele el Prezıdenti Qasym-Jomart Toqaevtyń usynymy boıynsha Joǵarǵy Sottyń sýdıalaryn saılaý týraly boldy. Depýtattardyń daýys berý nátıjesinde Dosjan Ámir men Qambar Nuryshev Joǵarǵy Sot sýdıalary qyzmetine saılandy.
Sonymen qatar senatorlar «Qazaqstan Respýblıkasynyń keıbir zańnamalyq aktilerine elektr energetıkasy, energııa únemdeý jáne energııa tıimdiligin arttyrý, jer qoınaýyn paıdalaný, jergilikti memlekettik basqarý jáne memlekettik shekara máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qarady. Nátıjesinde Senat depýtattary zań jobasyna birqatar túzetý engizip, ony Májiliske qaıtardy.
Naqty aıtqanda senatorlar kóppáterli turǵyn úılerdi kondomınıým nysanyn basqarýdyń jańa tásiline kóshirý merzimin 2023 jyldyń 1 shildesine deıin uzartýdy usyndy. Odan bólek, Palata depýtattary Almaty qalasyn damytý máselesine nazar aýdaryp, jyljymaıtyn múlikti resimdeý máselelerin qaraý jónindegi komıssııanyń qyzmeti men quzyreti týraly normalardy naqtylaý qajet ekenin jetkizdi. Senat engizgen túzetýlerdiń qatarynda Qazaqstan Respýblıkasy Ulttyq ǵylym akademııasynyń uıymdyq-quqyqtyq nysanyn ózgertýge, onyń negizgi ókilettikterin aıqyndaýǵa, «Ulttyq ǵylym akademııasynyń akademıgi» uǵymyn bekitýge jáne akademıkterge zeınetkerlik jasqa jetkennen keıin ómir boıy aı saıynǵy stıpendııa belgileýge qatysty usynystar bar. Bul normalardy «Ǵylym týraly» zańda naqty kórsetý usynyldy.
Sondaı-aq senatorlar Úkimettiń jáne Esep komıtetiniń 2021 jylǵy respýblıkalyq bıýdjettiń atqarylýy týraly esepterin tyńdady.
Otyrys barysynda jalpy byltyr respýblıkalyq bıýdjettiń negizgi parametrleri oryndalǵany atap ótildi. Degenmen, depýtattar bıýdjet qarajatyn jumsaýdyń tıimdiligin odan ári jaqsartý máselesine toqtalyp, halyqtyń ál-aýqatyn arttyrýǵa keri áser etetin birqatar mańyzdy jáne júıeli problemaǵa nazar aýdardy.
Senat Tóraǵasy elimiz damýdyń jańa kezeńine qadam basqanyn tilge tıek etti. Soǵan baılanysty qazir bıliktiń barlyq tarmaǵy Memleket basshysy belgilep bergen maqsattarǵa qol jetkizý jolynda kúsh biriktirýi kerek ekenin aıtty.
«Halqymyz 5 maýsym kúni Memleket basshysy jarııalaǵan konstıtýsııalyq ózgeristerge qoldaý bildirdi. Ata Zańǵa engizilgen túzetýler Jańa Qazaqstannyń negizin qalaıdy. Qazirgi tańda osy baǵytta saıası júıemizdi túbegeıli ózgertý úderisi júrip jatyr. Munyń bári, túptep kelgende, ádiletti memleket qurýǵa baǵyttalyp otyr. Biz halyq qoldaý bildirgen prezıdenttik reformalardyń iske asyrylýyn qamtamasyz etýimiz kerek», dedi Máýlen Áshimbaev.
Sonymen birge Senat Spıkeri memleket qarjysyn jumsaýdyń tıimdiligin arttyrý asa mańyzdy ekenin atap ótti.
«Jańa kezende memleket qarjysynyń jumsaýdyń jáne respýblıkalyq bıýdjetti oryndaýdyń tıimdiligin arttyrýymyz qajet. Osy baǵytta jańa ustanymdar men prınsıpter kerek», dedi Palata Tóraǵasy.
Budan basqa ol elimizdiń aldynda turǵan mańyzdy mindetterdiń biri óńirlerdiń damýyn jańa deńgeıge kóterý ekenin aıtty.
«Oblystarda ınfraqurylymdy jetildirý, kommýnıkasııalardy jańartý, áleýmettik nysandar salý, turaqty jumys oryndaryn ashý, halyqtyń ál-aýqatyn arttyrý baǵyttary boıynsha aýqymdy jumys atqarylýǵa tıis. Konstıtýsııalyq ózgeristerdiń aıasynda Senat óńirlerdiń máselelerin qarastyratyn negizgi ınstıtýt retinde anyqtaldy. Aldaǵy ýaqytta osy baǵytta Úkimetpen birlesip, nátıjeli jumys isteımiz dep senemiz», dedi Máýlen Áshimbaev.
Aıta keteıik, 2021 jylǵy bıýdjettiń atqarylýy týraly esep 2022 jylǵy 20 maýsymda ótetin Parlament Palatalarynyń birlesken otyrysynda qaralyp, qorytyndylanady.
Aıana Toǵanbek
