«Holdıngter men bankterden jáne eksporttaýshylardan memleketke tıesili barlyq kiristi jınaýdyń ornyna bolashaq urpaqtardyń aqshasyn alyp otyrmyz. Bankterdi qoldaýǵa buryn berilgen aqshany qaıtarýǵa belsendi túrde tyrysyp jatqan joqpyz, bul shamamen tórt mıllıard dollar», dedi senator.
Depýtat bıýdjettik jáne bıýdjetten tys túsimderge, ázirlengen Strategııalarǵa, memlekettik baǵdarlamalar men ulttyq jobalarǵa qaramastan, ekonomıka áli de jetkilikti deńgeıde jaqsara qoımaǵanyn atap ótti. Bul ekonomıkany ártaraptandyrý deńgeıiniń tómendigine jáne shıkizat óndirisi men eksportqa táýeldi bolýdyń deńgeıi joǵary ekendigine de baılanysty.
«Sonyń nátıjesinde – bıýdjet qarjysyn paıdalanýǵa pármendi baqylaý joq. Bıýdjet qarjysyn josparlaý men ıgerýdegi dástúrge aınalǵan tıimsizdik sonyń saldary. Mysaly, memlekettik baǵdarlamalar boıynsha ǵana bıýdjet qarajatyn jumsaýdyń tıimsizdigi 142,4 mlrd teńgeni qurap otyr. Barlyq memlekettik baǵdarlamalar men ulttyq jobalar boıynsha is júzinde 10 mlrd teńgeden 345 mlrd teńgege deıin aýqymdy qarjyny paıdalanýdyń tolyq emestigi baıqalady», dep atap ótti Edil Mamytbekov.
Senatordyń pikirinshe, osyǵan baılanysty Úkimet memlekettik josparlaý júıesinde tıisti tártip ornatýy kerek. Onyń tıimdiligin arttyrý úshin baǵdarlamalyq tásildiń ǵylymı-ádistemelik negizderin jetildirý de mańyzdy. Senator sondaı-aq Qazaqstanda tolyqqandy azamattyq qoǵamdy odan ári qalyptastyrý úshin jaǵdaı jasaı otyryp, memlekettik organdardyń qyzmetine qoǵamdyq baqylaý múmkindikterin kúsheıtý qajettigin de aıtyp ketti.
Aıana Toǵanbek
