Avtokólik ımporty kúrt azaıdy

Satylym boıynsha ekinshi aı qatarynan Chevrolet markasy kósh bastap tur. Bul mar­kanyń 2 630 birligi satylsa, ekinshi orynda 1 752 birlik satylymmen Hyundai tur. Kia dılerleri 914 kólik satqan. Lada avtomobılderi tórtinshi satyda tur: 831 birlik kólik satylǵan.

Camry jáne RAV4 model­deri­niń tapshylyǵyna baı­lanys­ty Toyota aldyńǵy pozı­­sııalarǵa talasa almaı tur. Alaıda LX 600 Lexus flag­ma­nynyń shyǵýymen, 251 avto­kólikti saýdalap, jetinshi orynǵa turaqtady. Ekinshi bestik ishinen úsh birdeı qytaılyq avto­kólik oryn enshilegen. Qos­tanaıda qurastyrylǵan JAC kólikteriniń 297 birligi, Chery-diń 207 birligi jáne Exeed modelderiniń 100 danasy óz ıesin taýypty. Onynshy orynǵa 70 satylymmen Renault ornalasqan.

10 úzdik tanymal model qatarynda – otandyq óndiristegi Chevrolet Cobalt (2 042 birlik), Hyundai Elantra (593) jáne Hyundai Tucson (391) bar. Odan ári qaraıǵy oryndardy Lada Granta (337), Hyundai Santa Fe (330), Chevrolet Nexia (303), Hyundai Sonata (284), Toyota Land Cruiser Prado (256), lıftbek JAC J7 (230) jáne Lada Vesta (213) kólikteri ıelengen.

Qaýymdastyqtyń málim­deýinshe, buryn Reseıde óndiril­gen tanymal modelderdiń tap­shy­lyǵyna jáne jetkizý qıyn­dyǵyna baılanysty eldegi satyp alý kólemi de tómen­degen. Reseıden keletin tehnıka úlesi 23,2-den 12,9 paıyzǵa deıin kemipti. Birinshi nesıe bıýrosynyń dereginshe, 2022 jyldyń sáýirinde Reseıden ákelingen kólik sany naýryzdaǵy kórsetkishten 2,5 ese az bolǵan. Naýryzda kórshi elden – 1 493, sáýirde 587 avtokólik ımport­talǵan. Bul 2020 jyldyń mamyr aıynan beri tirkelip turǵan eń tómengi kórsetkish.

Biraq Azııa elderinen tasylatyn kólik sany kóbeıgen. Máselen, Japonııadan sáýir­de 20,7 mln dollarǵa 1 575 bir­lik kólik ákelinse, Ońtústik Koreıadan 7,7 mln dollarǵa 732 birlik kólik ımporttalypty. Jalpy, sáýir aıynda el aýmaǵyna kirgizilgen kólik sany – 4 949. Oǵan 106,2 mln dollar qara­jat jumsalǵan. Árıne, munyń bári tek salonda ǵana satylatyn sý jańa ári qymbat kólikter. Oǵan ekiniń biriniń qoly jete bermeıdi. Qara halyqtyń qoly jetsin dep memleket jaqynda ǵana jeńildetilgen avtonesıe baǵdarlamasyn bastaǵan. Biraq onyń ózi daýmen bastal­dy jáne qazir ýaqytsha toqtap tur. Baǵdarlama operatory – «О́nerkásipti damytý qory» AQ málimetinshe, 100 mlrd teń­ge ekinshi deńgeıli bankterge ke­lesideı lımıt boıynsha bólingen: «Eýrazııalyq bankke» – 35 mlrd teńge, «Bank SentrKredıtke» – 27,5 mlrd teńge, «Qazaqstan Halyq Banki­ne» – 15 mlrd teńge, Forte Bank-ke – 15 mlrd teńge. Baǵ­darlama bastalǵaly bankter jalpy somasy 71 mlrd teńgege 9 575 ótinimdi maquldaǵan. Sonyń ishinde «Eýrazııalyq bank» 15,6 mlrd teńgege 2 068 ótinimdi, BSK 25,9 mlrd teńgege 3 462 ótinimdi, Halyk Bank 19,4 mlrd teńgege 2 630 ótinimdi jáne Forte Bank 9,9 mlrd teńgege 1 415 ótinimdi maquldaǵan.

Osylaısha, «Eýrazııalyq bank» ózine birinshi transh aıasyn­da berilgen qarajatty tolyq ıge­rip, qazir 20 mlrd teńge kólemin­degi ekinshi transhty alý prosedý­rasyn ótkerip jatyr eken. «Qazaqstan Halyq Banki» lımıtti 7,5 mlrd teńgege kóbeıtýge nıet­ti. Qor avtonesıe aıasynda BSK men Forteniń ótinim qabyldaý­dy jalǵastyryp jatqanyn habarlady. Qor baspasóz qyzmeti sondaı-aq baǵdarlamanyń revolverlik júıemen jumys isteıtinin, ıaǵnı, zaımdar bo­ıynsha qaıtarylǵan aqsha esebinen bankterdiń qaıtadan qosymsha qarjylandyrýdy qarastyratynyn aıtty.