El Prezıdenti Nursultan Nazarbaevtyń ótken jylǵy 22 sáýirde Astana qalasyn odan ári damytý boıynsha bergen tapsyrmasyna oraı óńirlerdegi teatrlar men murajaılardy, jeke oryndaýshylar men shyǵarmashylyq ujymdardy keńinen tanystyrý maqsatynda mádenı jobalar uıymdastyrý qolǵa alynǵan edi. El júregine ońtústik shýaǵyn syılaı engen kıeli Áýlıeata eliniń kól-kósir sulý órnegi kóz toımastaı qazynaly.
Elordadaǵy Q.Qýanyshbaev atyndaǵy qazaq mýzykalyq drama teatrynda belgili qalamger Sherhan Murtazanyń shyǵarmasy negizinde sahnalanǵan «Domalaq ana» spektaklin jurtshylyq súısine tamashalady. Bul – bir. Ekinshiden, Jambyl oblystyq fılarmonııasy usynǵan «Taraz – ǵasyrlar kýási!» atty óner keshine qatysýshylar jyly jaqqa oralǵan qustardyń kóktemde salǵan ásem sazyndaı áser qaldyrdy. «Alataý» folklorlyq, «Káýsar» vokaldyq, «Aqkerbez» bıshiler ansamblderi, «Symbat» baldyq bı toby, «Taraz» trıosy, «Jambyl-Star» trıosy, jeke oryndaýshylardan Jandos Omarov, Ǵanı Mátebaev, Maralbek Babaqulov, Mádına Saǵymbekova, Dınara Dıqanbaeva sııaqty týǵan jerdiń týyn jelbiretip júrgen óńkeı óren tutasa tuǵyrǵa kóterilgende, sahna quraqtaı qulpyrdy. Qazaqstannyń eńbek sińirgen qaıratkeri, Jambyl oblystyq fılarmonııasynyń dırektory Sáýle Janpeıisova óneri óz aldyna ǵajaıyp bir keste emes pe? Halyq áni «Gákkýdi», sózin T.Aıbergenov jazǵan, óziniń «Ortańa keldi óz balań» ánin shyrqaǵanda, daýysy bulbuldyń únindeı syńǵyrlaı áýelegen ánshige qoshemetpen kóp qol soǵyldy.
Jergilikti kompozıtorlardyń shyǵarmalary men halyqtyq jaýharlardy qalap oryndaǵan tarazdyq ónerpazdar oryndaýynda «Shattyq», «Dala erkeleri», «О́rnek» bıleri, «Jańarǵan Jambyl», «Qazaqtaı elmiz ǵalamat», «Qazaq valsi», «Aqbaqaı», «Kózimniń qarasy», «Jaıdarly Jambylym», «Tarazym», «Qarataý», «Kóktem valsi» sııaqty t.b. birtalaı tańdaýly ánder tamyljı qalyqtady.
Úshinshiden, Jambyl oblystyq tarıhı ólketaný murajaıynyń kórmesi ulttyq qundylyqtardy ulyqtaýmen astasa órildi. О́ńirdiń tarıhı keskin-kelbeti shynaıy beınelermen bederlenip tanystyryldy. Osy bir úsh túrli ónegege óńir jyry túgel syıyp ketkendeı.
«Egemen-aqparat».
––––––––––––––
Sýretterdi túsirgen
Erlan OMAROV.
