Erlan Qoshanov memleketaralyq qatynastardy ekologııalyq qana emes, ulttyq qaýipsizdikti qamtamasyz etýdiń mańyzdy sharttarynyń biri retinde qarastyrýdy usyndy.
«Kórshi eldermen ózara tıimdi yntymaqtastyq ornatý Qazaqstannyń sý qaýipsizdigin qamtamasyz etýde sheshýshi faktor bolýy tıis», dedi QR Parlamenti Májilisiniń spıkeri.
Erlan Qoshanov atap ótkendeı, búginde tolyqqandy memlekettik sý kadastry joq, bul sý resýrstarynyń sandyq jáne sapalyq jaǵdaıyna monıtorıng júrgizýdi edáýir qıyndatady jáne ekonomıka salalaryn sýmen qamtamasyz etýdiń senimdi teńgerimine ıe bolady.
Búgingi tańda sý rejımin, sý aǵyndary men sý qoımalaryn zertteý úshin barlyǵy 310 gıdrologııalyq beket jumys isteıdi.
Ol sondaı-aq sý sharýashylyǵy ınfraqurylymy ártúrli memlekettik organdardyń qaraýynda ekenin atap ótti. Májilis spıkeriniń aıtýynsha, bul sý resýrstaryna qatysty tıimdi memlekettik saıasatty júrgizýdi qıyndatady. Máselen, sýmen jabdyqtaý kózderi – bul jerasty, jerústi jáne toptyq sý taratqyshtar úshin ekologııa, geologııa jáne tabıǵı resýrstar mınıstrligi, eldi mekenderde sýmen jabdyqtaýdy damytý úshin QR IIDM jaýap beredi, al josparlaý, salý jáne odan ári paıdalaný ákimdikterdiń quzyretine jatady.
«Aldaǵy ýaqytta Májiliske jańa Sý kodeksin engizý qajet. Mende bar aqparat boıynsha bul kodeks ázirlenip jatyr. Ol jaqyn arada Parlamentke engizilýi tıis. Eń bastysy, kodeks sý resýrstaryn saqtaýǵa jáne olardy tıimdi paıdalanýǵa baǵyttalýy kerek. Sondaı-aq eldi mekenderde sýmen jabdyqtaý jáne sý burý júıelerin paıdalaný, jobalaý, salý jáne rekonstrýksııalaý jóninde biryńǵaı operator qurý qajet. «Qýatty óńirler – el damýynyń draıverleri» ulttyq jobasyn iske asyrý sheńberinde bıýdjet shyǵystaryn josparlaý kezinde sýmen qamtamasyz etilý kórsetkishteri ortasha respýblıkalyq deńgeıden tómen óńirlerge qarajat bólý qajet», dedi E. Qoshanov.
