Radıologter eýropalyq mektebiniń maqsaty – Qazaqstannyń jas radıologterine áleýmettik máni bar aýrýlardy (júrek pen qantamyrlar patologııasy, ókpe týberkýlezi, qımyl-tirek apparaty jáne sút beziniń qaterli isigi) dıagnostıkalaýdy radıologııalyq halyqaralyq standarttary jáne radıasııalyq qaýipsizdik erejelerine saı bilim berý.
Eki apta ishinde (OARM) «ASTANA Týtorıal» qatysýshylary radıologııa salasyndaǵy AQSh, Kanada, Aýstrııa, Ońtústik Koreıa, Taıvan, Belgııa, Reseı jáne Qazaqstannyń belgili mamandarynyń dáristerin tyńdaıtyn bolady. Dáris berýshilerdiń qatarynda Radıologterdiń eýropalyq mektebiniń dırektory, professor Reınmıýller Raıner, Reseı radıologteri qaýymdastyǵynyń prezıdenti, professor Valentın Sınısın, Pensılvanııa ýnıversıtetiniń radıologııa departamentiniń neıroradıologııa sýbspesıalızasııa baǵdarlamasynyń dırektory, professor Sýıash Mohan, Qazaqstan radıologteri qaýymdastyǵynyń prezıdenti, professor Raýshan Raqymjanqyzy bar.
Is-shara barysynda baıandama oqyp, túıtkildi máseleler tóńireginde oı órbitken Qazaqstan radıologııalyq qoǵamynyń prezıdenti, professor Raýshan Rahymjanqyzy: «Búgin mekteptiń ashylýynyń alǵashqy kúni. Biz 2018 jyly Azııa-Tynyq muhıttyq radıologter qaýymdastyǵynyń quramyna kirgen bolatynbyz. Sonyń nátıjesi retinde osy mektep ashylyp otyr. Bul eki aptalyq mektepte Azııa elderiniń mamandary dáris oqıtyn bolady. Bizdiń ortalyqtyń músheligine kirýimizdiń artyqshylyǵy osy – búgingi eki aptalyq mekteptiń ashylýy. Mektep myqty radıologterdiń shyǵýyna úlken septigin tıgizedi. Sebebi álem boıynsha joǵarǵy sapaly radıologterden dáris tyńdaýǵa múmkindik týyp otyr. Mysaly búgin Kanada, Taıvannan ǵalymdar onlaın túrde dáris oqýda», dedi.
Joǵary deńgeıde uıymdastyrylǵan is-sharanyń koordınatory, Qazaqstan radıologter qoǵamynyń vıse-prezıdenti Taıyrhan Bekbolatuly mańyzdy is-shara jóninde pikir bildirdi.
– Birneshe jyl buryn osy shetelden professorlardy shaqyrý jaıly jobany utyp alǵan edik. Eki jyl pandemııa kezinde ótkize almadyq. Bıyl sol jobany qolǵa alyp otyrmyz. Eki aptada mamandarymyz 60 dáris tyńdaıtyn bolady. Oǵan ásirese jas radıologterdi shaqyrdyq. Nur-Sultannyń ózinen 88 radıolog bar, 3 maman Qyrǵyzstannan keldi. Bir aıta keterlik jaıt, oqýdy aqysyz qyldyq. Buǵan deıin 2014-2019 jyldar aralyǵynda 6 ret eń úlken Eýropalyq radıologter mektep jobasyn ótkizgenbiz. Búgingi jobany endi ózimizdiń qoǵamnyń atynan ashyp otyrmyz. Jobanyń maqsaty – jastardy halyqaralyq deńgeıde bilim alýǵa, oılanýǵa úndeý, halyqaralyq kólemde jumys isteýdi úıretý. О́ıtkeni Amerıkada, Eýropada radıologterdi 4-5 jyl oqytady. Bizde áli 2 jyl ǵana oqytyp kelemiz. Bıyl, mine, 5 jyldyǵyn ashyp jatyrmyz. Menińshe, osyndaı mektepter qazaq radıologııasyn halyqaralyq deńgeıge kóteredi dep senemin. 60 leksııa – balalar úshin bilimniń meıramy sekildi. О́ıtkeni ekiniń biri shetelge baryp, bilikti ustazdardan leksııa tyńdaýǵa múmkindik taba bermeıdi. Leksııany Koreıadan, Taıvannan onlaın formatta oqıdy, jańa ǵana Kanadadan oqydy, Máskeýden de ǵalymdar onlaın túrde baıandamasyn oqymaq» dedi.
ESOR Astana Tutorial radıologterdiń III Ortaazııalyq mektebi Qazaqstandaǵy dıagnostıkalaý qyzmetiniń damýyna yqpal etip, tájirbıesin arttyrary sózsiz. Is-shara 24-maýsymǵa deıin jalǵasyn tappaq.
