«Jańa Qazaqstandaǵy memlekettik qyzmetshiniń bolmysy» atty ashyq formatta ótken alqaly basqosýǵa Májilis jáne Senat depýtattary, belgili qoǵam qaıratkerleri men esimi elge tanys azamattar oı-pikirlerin ortaǵa saldy.
Jıynǵa qatysqan Senat depýtaty Nurtóre Júsip, Májilis depýtattary Amanjol Áltaı, Janarbek Áshimjan, Nazılıa Razzak, Berik Bekjanov, «Habar agenttigi» AQ basqarma tóraǵasy Berik Ýálı, Eýropalyq quqyqtar jáne adam quqyqtary saraptamalyq ınstıtýtynyń dırektory Marat Báshimov «Jańa formattaǵy memlekettik qyzmetshiniń bolmysyn qalyptastyrýda agenttik tarapynan qandaı is-qımyldar qabyldanýǵa tıis?», «Memlekettik aqparatty transformasııalaý prosesine qoǵam belsendilerin, aqparat quraldaryn qalaı tartýǵa bolady?» degen saýaldar tóńireginde óz usynystaryn jetkizdi.
Sondaı-aq Memlekettik qyzmet isteri agenttigi janyndaǵy Qoǵamdyq keńes tóraǵasy Serikjan Qanaev, qoǵam qaıratkeri Sádibek Túgel, KAZGUU basqarma tóraǵasy Talǵat Nárikbaev, Academy of Labour Relations JShS bas dırektory Bıbigúl Nurasheva, jýrnalıster Denıs Krıvosheev, Qanat Áýesbaı, Ádil Jalılov, «Ádildik joly» Qoǵamdyq birlestiginiń atqarýshy dırektory Dıdar Smaǵulov, «Qoǵamdyq pikir» zertteý ınstıtýtynyń ǵylymı konsýltanty Qalamqas Esimova, KAZGUU bıznes mektebiniń dırektory Alına Abdrahmanova, Qazaqstannyń eńbek sińirgen qaıratkeri Qanat Aıtbaev, Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń dırektory Aıbolat Jaýdyr, Joǵary kólik jáne kommýnıkasııa kolledji dırektory Zýlfýhar Gaıpov memlekettik qyzmetshilerge áleýmettik jaǵdaılar jasaý, olardy rýhanı turǵyda ósirýdiń mańyzdylyǵy jóninde oılarymen bólisti.
«Egemen Qazaqstan» RG» JShS bas dırektory Darhan Qydyráli memlekettik qyzmetshiniń eń aldymen memlekettiń, ulttyń, halyqtyń qyzmetshisi bolýǵa tıis ekenin aıta kelip: «Qarapaıym halyq keshegi О́zbekáli Jánibekov, Ábish Kekilbaev, Ilııas Omarov syndy memlekettik qyzmette júrip halyqqa qaltqysyz qyzmet etken qaranarlardy izdeıdi», dedi.
Jıyn tizginin ustaǵan Memlekettik qyzmet isteri agenttiginiń tóraǵasy Darhan Jazyqbaev kezdesýdiń mańyzdylyǵyn atap ótip, dóńgelek ústeldiń basty maqsaty – memlekettik qyzmetker qandaı bolýy kerek degen suraq negizinde olardyń bet-beınesin aıqyndaý ekenin aıtty.
«Memlekettik qyzmet ol paıda tabý men kún kórýdiń quraly dep qabyldaýdan áldeqaıda bıik túsinik. Ol – paryz, adamshylyq borysh, halyqtyń senimi. Ár azamattyń eldiń aldyndaǵy adamshylyq mıssııasy – elge qyzmet etý. Bul zor mártebe. Sanada osyndaı túsinikterdi ornyqtyrǵan kezde ǵana adal nıetti, ádil, halyqqa qyzmet etýdi paryz dep sanaıtyn qyzmetshilerdiń tolqyny qalyptasady. Kerisinshe el úshin emes, jeke bas úshin qyzmet etý basty maqsatqa aınalady. Sondyqtan basty ustanym – adal nıetpen elge qyzmet etý bolýy kerek. Osy baǵytta sanaly túrde jańǵyrý qajet. Memlekettik qyzmetshige azamattyq sana, eldik sana, memleketshildik sana basty qundylyq bolýǵa tıis», dedi agenttik basshysy.
Sarapshylar memlekettik qyzmetshiniń halyqqa adal ári kásibı qyzmet kórsetýi, onyń áleýmettik jaǵdaıyn jaqsartý, BAQ tarapynan qoldaý arqyly memlekettik qyzmettiń bedelin kóterý, memlekettik tildiń mártebesi, oqytý baǵdarlamalaryna tarıhı tulǵalardyń ónegesin engizý týraly sóz qozǵady.
Kezdesýde memlekettik qyzmetshiniń halyq aldynda ashyq bolýy, qyzmettik mindetterin oryndap qana qoımaı qoǵamda sybaılas jemqorlyqqa qarsy mádenıetti qalyptastyrýda ózgelerge úlgi bolý kerektigi aıtyldy.
Basqosý barysynda sarapshylar óz usynystaryn ortaǵa salyp, memlekettik qyzmetshiniń bolmysyna qatysty pikirlerimen bólisti.
