Qazaqstandyq tennısshi bul synda reseılik Anastasııa Tıhonovamen birge fınalda qytaılyq Lý Szıa Sın jáne japonııalyq Iý Sıaodı jubymen bas júldeni sarapqa salyp, eki sette esh qıyndyqsyz jeńiske jetti. A.Danılına men A.Tıhonova birinshi partııada 6:4 esebimen basym tússe, ekinshi sette de qazaqstandyq-reseılik jup qarsylastaryna esh múmkindik qaldyrmady – 6:2. Osylaısha, bir saǵattan sál astam ýaqytqa sozylǵan oıyn A.Danılına men A.Tıhonovanyń jarqyn jeńisimen aıaqtaldy.
Bul – Anna Danılınanyń juptyq synda jeńip alǵan 26-shy tıtýly. Qazaqstandyq tennısshi sonyń 25-in Halyqaralyq tennıs federasııasy (ITF) aıasynda ótken jarystarda oljalaǵan bolsa, bireýin bıyl qańtarda brazılııalyq Beatrıs Haddad Maııamen birge Sıdneıdegi WTA 250 týrnırinde jeńip alǵan bolatyn.
