ASTANA. 24 sáýir. Qazirgi tańda el turǵyndarynyń basym bóligi ózderin aldymen qazaqstandyqpyz dep esepteıdi, al sodan keıin baryp óz tekterin aıtady. Bul týraly Kazakhstan Today habarlady.
Áleýmettanýshy Bek Arǵynov «Adamǵa Otan tańdaý quqy berilmeıdi» atty maqalasynda: «Búginde elimizdiń halqynyń basym bóligi ózderin qazaqstandyqpyz dep sanaıdy. Olar sodan keıin baryp óz ulttaryn sóz etedi. Qazaqstanda bir ǵana ult turmaıdy, biraq Otanymyz jalǵyz, bizde tutynylatyn din ártúrli, alaıda, maqsatymyz bireý, ol – damyǵan memleketterdiń qatarynda turý. Qazaqstandaǵy túrli etnostyń árqaısysynyń óz tarıhı otandary bar. Adam dúnıege kelgende onyń Otan tańdaýǵa múmkindigi bolmaıdy...
Burynǵy kezeńdi bylaı qoıǵanda, qazirgi táýelsizdik jyldary «Meniń otanym Qazaqstan» dep maqtanatyn, eliniń bolashaǵy úshin ýaıym jeıtin urpaq ósip-ónip shyqty», – dep jazady.
Maqala avtor Qazaqstan halqynyń tatýlyǵy men birligi talaı syn tezinen ótkenine de mysaldar keltirgen.
«Elimizde kelisim men tatýlyq jaıdan-jaı ornyqqan joq. Ol halyqtyń, memlekettiń kúsh-jigerimen qalyptasty», – deıdi Bek Arǵynov.
Avtor óz maqalasynda Memleket basshysynyń: «Biz birlese, tize qosa otyryp, otanǵa degen súıispenshilikti oıatar senimdi tuǵyrnama túze bildik. Biz qurǵan qoǵamda etnosaralyq kelispeýshilik joq, barlyǵy zań aldynda birdeı» degen sózine erekshe mán bergen.
Bek Arǵynov óz maqalasynda: «Barlyq qazaqstandyqtar – týǵan jerimizdiń súıikti perzentteri. Birlik pen tatýlyq – bizdiń qoǵamnyń basty baılyǵy. Bizdiń ekonomıkamyz damydy, azamattardyń ál-aýqaty jaqsardy. Endi aldymyzda «Qazaqstan-2050» strategııasyn júzege asyrý mindeti tur», – deı kele osy aýqymdy baǵdarlamanyń talabyn oryndaýda birlik pen tatýlyqtyń mańyzdy ról atqaratynyn aıtady.
Sondaı-aq, avtor Qazaqstan halqy Assambleıasyn elimizdegi rýhanı jáne mádenı kelisimniń negizgi tiregi dep sanaıdy.
Elimiz boıynsha 820 etnomádenı birlestiktiń basyn biriktirip otyrǵan Qazaqstan halqy Assambleıasy tarapynan álem nazaryna usynylǵan qazaqstandyq modeldi Bek Arǵynov joǵary baǵalaıdy. Ol atalǵan qurylymnyń aıasynda atqarylyp jatqan jumystardyń jastardy otansúıgishtikke tárbıeleýde mańyzy zor ekenin jetkizgen.
Joldybaı Bazar.
Derekkóz: Kazakhstan Today.
Foto: Altaynews.kz.
