Boks. Qazaqstandyqtar qorjynynda - 2 altyn, 2 kúmis medal!

ASTANA. 24 sáýir. Búgin Bolgarııanyń astanasy – Sofııa qalasynda bokstan jastar arasyndaǵy álem chempıonaty márege jetti. Onda fınalda óner kórsetken 4 qazaqstandyqtyń ekeýi altyn, ekeýi kúmis júldeger atandy. Bul týraly egemen.kz habarlady. Osy júldeleriniń arqasynda Qazaqstannyń jigitter arasyndaǵy jastar quramasy komandalyq esepte birinshi oryndy jeńip aldy. Bulardan bólek, bir qyzymyz – Alýa Balqybekova (51 kg) qola medalge qol jetkizdi.

Fınaldyq shaıqasty 49 kıloǵa deıingi salmaqtaǵy bizdiń Shalqar Aıqynbaı (2-sýrette) men ózbek Sýleıman Latıpov bastady. Urys qazaqstandyq boksshynyń basymdylyǵymen ótti. Nátıjesinde ol 3:0 esebimen jeńiske jetti. Osylaısha Shalqar chempıonattyń alǵashqy altyn júldegeri atandy. О́kinishtisi, qazaqstandyqtar sapynan shyqqan kelesi boksshymyz – Sultan Záýirbek kýbalyq Javer Ibaneske 0:3 esebimen ese jiberip qoıdy. Sondyqtan oǵan buıyrǵany kúmis medal boldy.

Jasyratyny joq, jankúıerler 60 kıloǵa deıingi salmaqtaǵy Abylaıhan Júsipovten (3-sýrette) osy birinshilik bastalǵaly altyn medal kútken edi. Olardyń úmitine saı boksshymyz týrnırde shaıqastan shaıqasqa jaqsy qarqyn qosa berdi. Ol fınalda da jaqsy aıqasty. Buǵan onyń rýmynııalyq Arsen Mýstafamen jekpe-jekti 3:0 etip aıaqtaǵany da dálel. Sóıtip, komandaǵy ekinshi altyn júldeni Abylaıhan ákeldi. Osy kezge deıin ol álemniń 2013 jylǵy jasóspirimder arasyndaǵy, Azııanyń 2014 jylǵy jastar arasyndaǵy chempıony atanyp úlgergen bolatyn. Budan keıin 81 kıloǵa deıinge salmaqtaǵy qazaqstandyq Vadım Kazakov bolgar Blagoı Naıdenovtan 0:3 bolyp utylyp qaldy. Quramadaǵy ekinshi kúmis medal osylaı keldi. Damır Qojamqul. Derekkóz: egemen.kz, Foto: VKontakte.