Mundaı alqaly jıyn Aqordada emes, shań-topyraǵy burqyrap jatqan shalǵaıdaǵy Qazaqtyń kıeli jerinde ótkizýdiń óziniń sımvolıkalyq astary bar.
Júzden asa adam tań bozara turyp, jolǵa shyǵyp, tas jolmen selkildep, aptap ystyqta Ulytaýǵa toı toılaýǵa emes, oı qozǵaýǵa bardy. Túrtseń qazba shyǵatyn deıtin kendi ólkeniń qazirgi aıanyshty jaǵdaıyn ult janashyrlary kózben kórdi. Taǵy bir márte qazir sózdiń emes, istiń, bóliný emes, birigý kezeńi ekenin sezindi.
Oblys ataýynan ǵana emes, bar baılyǵynan da aıyrylǵan óńirdi ǵana emes, búkil eldi túletý, boıyna qan júgirtip, qalt-qult kún keshken eldiń eńsesin kóterip, seldiregen senimin, úkili úmitin oıatý, bir muratqa jalpaq jurtty jumyldyrý úshin ne jasalýy kerek?
Memleket basshysy jaı syn, qur dabyra, sapyrma sóz emes, naqty oı, utymdy usynys kútti. Ultty uıystyratyn, bir muratqa jumyldyratyn oı-pikirdi tyńdady.
El arasynda abyroıly, aýzy dýaly aǵalar men oıy ozyq zamandastar tarapynan biraz oı aıtyldy da. Ulytaýdaǵy minbeden sóıleı almaǵandar úshin arnaıy Qurultay mobıldi qosymshasy jumys isteıtin bolady. Endi el búgini men erteńine, memlekettiń damýyna, azamattyq qoǵamnyń bekýine qatysty oı-usynystary bar qazaqstandyqtar quryltaı jumysyna belsene qatysa alady.
Memleket basshysy osy joly qoǵamda aıtylyp júrgen barlyq máseleden habardar ekenin, jaı habardar emes, oryndy syn-usynystar boıynsha eń joǵarǵy deńgeıde ózgeris, naqty sheshim qabyldanatynyn taǵy bir dáleldedi.
Bir quryltaımen qyrýar másele bir kúnde sheshilmesi anyq. Quryltaıdan qaıtqan jurttyń árqaısysynyń sanasynda jańarǵan Qazaqstan týraly ádemi arman-úmit, senim qylań bergeni ras. Kıeli jerde aıtylǵan tilek qabyl bolsyn.
Al bizdiń mindet – sol úshin jumys isteý.
Bıbigúl JEKSENBAI,
«Bas redaktorlar klýby» respýblıkalyq qoǵamdyq birlestiginiń prezıdenti
