Bul is-sharaǵa elimizdiń barlyq óńirlerindegi áskerı-patrıottyq klýbtardyń, Qarýly kúshterdiń, basqa da áskerler men áskerı quralymdardyń, áskerı kolledjderdiń, mektep-ınternattardyń jáne «Jas ulan» respýblıkalyq mektepteriniń ókilderi bir jyl boıy daıyndaldy.
Jas patrıottardy Parlament Senatynyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed, «Qarýly kúshterdiń ardagerleri» respýblıkalyq qoǵamdyq birlestigi Ortalyq keńesiniń tóraǵasy armııa generaly Muhtar Altynbaev quttyqtady. Sondaı-aq, jas patrıottarǵa qoldaý kórsetýge Qarýly kúshterdiń ardagerleri, BUU bitimgerlik mıssııalaryna, jaýyngerlik is-qımyldar men jergilikti qaqtyǵystarǵa qatysýshylar, memlekettik organdardyń, jurtshylyq pen BAQ ókilderi de keldi.
Buǵan deıin ótken jeti jıynnyń jeńimpazdary men «Jas sarbaz» mamandandyrylǵan synyptarynyń túlekteri qonaq retinde shaqyryldy. Búginde olardyń deni ofıser, joǵary áskerı oqý oryndarynyń kýrsanty, áskerı qyzmetshi, «Jas ulan» respýblıkalyq mektepteriniń tárbıelenýshisi ekenin atap ótken jón.
«Eldiń damýy men gúldenýi, onyń keleshegi jas urpaqqa tikeleı baılanysty. Memleket basshysy – Qarýly kúshterdiń Joǵarǵy bas qolbasshysy Qasym-Jomart Toqaev «Jastar damýdyń sımvoly jáne jarqyn bolashaqqa degen úmittiń kórinisi» dep beker aıtqan joq», dedi Qorǵanys mınıstri general-polkovnık Rýslan Jaqsylyqov.
Qorǵanys vedomstvosynyń basshysy árbir jas adamnyń áskerı mamandyqty tańdaǵanyna nemese tańdamaǵanyna qaramastan, Otandy qorǵaý deıtin qasıetti mıssııaǵa daıyn bolý kerek ekenin atap ótti.
Jıynda áskerı orkestrdiń mýzykalyq kompozısııalary shyrqalyp, vokaldyq jáne bı nómirleri oryndaldy. Orkestrlerdiń sınhrondy defılesinde barabanshylar óner kórsetti. Desanttyq-shabýyldaý rotasynyń kórsetilimi men arnaıy kúshter tobynyń qatysýymen ótken taktıkalyq jaýyngerlik epızod kórermenderge erekshe áser berdi.
Jıynǵa qatysýshy 600 oqýshy úshin oqý ortalyǵynyń aýmaǵynda jaqsy turmystyq jaǵdaı jasalǵan. Jatyn oryn shatyrlary, turmystyq bólmeleri men as úıi bar dalalyq lager qurylǵan. Sondaı-aq murajaı ekspozısııalary, «Aıbyn – patrıottar mekeni» alleıasy, qarý-jaraq pen áskerı tehnıka jáne kıim úlgileriniń kórmesi uıymdastyrylǵan.
Jıyn baǵdarlamasynda 11 konkýrs pen áskerı-qoldanbaly jáne áskerı-sporttyq jarystar bar. Álemdegi epıdemıologııalyq jaǵdaıǵa baılanysty jarystar eki jyl boıy onlaın-formatta ótkizilgeni belgili. Al bıylǵy jıynda qatysýshylar sandyq keńistikte de, taktıkalyq alańda da baq synaıtyn bolady.
Aıana Toǵanbek
