Bul shamamen 500 jańa jumys ornyn quryp, turǵyndardy jumyspen qamtýǵa múmkindik beredi. Jol boıyndaǵy servıs nysandarynyń kóbi respýblıkalyq trassalarda ornatylady. Máselen, «Ekaterınbýrg-Almaty» tasjolynyń 1333 shaqyrymynda, atap aıtqanda «Nur-Cultan – Temirtaý» aqyly ýchaskesinde modýldik úlgidegi jańa pavılon ornatylady.
Jol boıyndaǵy qyzmet kórsetý nysanynda erekshe qajettiligi bar turǵyndar úshin barlyq jaǵdaı jasalyp, arnaıy sanıtarlyq-gıgıenalyq torap ornatyldy. Modýldik pavılonda saýda alańy da bar. Sonymen qatar jaqyn jerde júrgizýshiler úshin arnaıy demalys alańy da qarastyrylǵan.
«QazAvtoJol» ulttyq kompanııasy jol boıynda ornalasqan qyzmet kórsetý nysandaryn odan ári damytýǵa shaǵyn jáne orta bıznes ókilderin tartý boıynsha belsendi jumystar júrgizip jatyr.
«Nysan paıdalanýǵa berilgenge deıin, qujattardy rásimdeýge kómektesip, zań aıasynda keńes beremiz. Qyzyǵýshylyq tanytqan azamattar 1403 qysqa nómiri boıynsha bizdiń biryńǵaı táýlik boıy jumys isteıtin koll-ortalyqqa habarlasa alady. Barlyq usynystardy qarastyrýǵa daıynbyz. Áleýetti ınvestorlar úshin bir ǵana talap bar - bul erekshe qajettiligi bar azamattar úshin qolaıly jaǵdaı jasaý, ıaǵnı pandýstar, tirekter, tutqalar jáne arnaıy ájethanalar ornatý», dedi «QazAvtoJol» jol boıyndaǵy servısti damytý bóliminiń basshysy Dıas Arynov.
Eske sala keteıik, qazir respýblıkalyq trassalardyń boıynda 1600-den astam servıs obektileri jáne 620-ǵa jýyq bos turǵan demalys alańdary bar.
