«Qala turǵyndarynyń jyl saıyn artyp kele jatqanyn eskerer bolsaq, áleýmettik nysandarǵa, onyń ishinde oqý oryndaryna degen suranys artyp keledi. Josparǵa sáıkes oqýshy oryndarymen qamtamasyz etip, jumys istep turǵan oryndarǵa túsetin artyq júktemeni alyp tastaý úshin jyl saıyn keminde 10 mektep salý qajet. Úsh jyl ishinde 34 mektep salynyp, paıdalanýǵa berildi. Bul oqý oryndarynda 70 myń oqýshy orny ashyldy.
Qalany aralaý barysynda birqatar mekteptiń qurylysymen tanystym. Máselen, Uly dala dańǵylyndaǵy jáne 187-kóshe, 18/4 mekenjaıyndaǵy (Saryarqa aýdany) eki mektepti aralap shyqtym.
Mysalǵa, №65 mekteptiń (Saryarqa aýdany) ereksheligi – ınklıýzıvti bilim berý júıesi bar. Bul jerde estý, tirek-qımyl apparaty buzylǵan balalar oqıdy. Munda barlyǵy 3 myńnan asa oqýshy qamtylǵan, bul oqý ornynyń ózine tán qýattylyǵynan asyp túsedi. Mekteptiń qýattylyǵyn arttyrý úshin janynan jańa korpýstyń qurylysyn bastadyq. Jańa korpýs taǵy 1200 oqýshy ornyn (eki aýysymda) ashýǵa múmkindik beredi.
Esil aýdanynda ornalasqan mekteptiń (Uly Dala dańǵyly men №39 kósheniń qıylysy) qurylysy uzaqqa sozyldy. Sebebi óz isine jaýapsyz qurylys salýshy mindettemelerin oryndamady. Biz onymen kelisimshartty úzdik, mektep qurylysyn toqtap turǵan jerinen qozǵadyq. Bul mektepti bıyl aıaqtaýdy josparlap otyrmyz. Atalmysh nysan 2400 oqýshyǵa (eki aýysymda) josparlanǵan.
Osylaısha, jańa oqý jylynda (2022-23 jj) taǵy 20 myńnan asa oqýshy ornyn ashýdy (2 aýysymda) josparlap otyrmyz», dep jazdy elorda ákimi.
