El ishinde júrip eleýli eńbek etetin qyzmetkerlerdiń eńbegi keıde kóptiń kózine kórinbeı, qaltarysta qalyp jatatyny bar. Basqa-basqa, dál osy JQAJ qyzmetkerlerine degen talaptyń joǵary ekeni daýsyz. Olardyń boıynda fızıkalyq daıyndyq, sportqa beıimdilik menmundalap turýy kerek. Bir sózben aıtqanda, arnaıy jasaq qyzmetkerleri qaı kezde de shaqyrtýlarǵa daıyn turýǵa tıis. Jumystaryna qaı kezde de kásibı kózqaraspen qaraıtyn sala qyzmetkerleri muny óte jaqsy túsinedi. Olar jaýapkershilik júgin moıymaı kóterip júr.
«2011 jyldan bastap osy salada túrli qyzmetterdi atqaryp júrmin. Patrýldik polısııa, ıývenaldyq polısııada eńbek etken jaıym bar. Kóshi-qon qyzmetinde de ter tógip, tájirıbemdi tolystyrǵan bolatynmyn. Qazirgi tańda JQAJ-da jumys istep júrmin. Álbette, bizdiń jumys jedeldikti talap etetini daýsyz.
Bul jumysty atqarý ońaı emes. Jumysqa turý úshin aldymen joǵary bilimmen qatar áskerı bıletiń bolýy shart. Odan bólek sport sheberi nemese osy ataqqa kandıdat bolýǵa tıistisiń. Qyzmetke ornalaspas buryn arnaıy emtıhan tapsyrdyq. Bir sózben aıtqanda, arnaıy jasaqta eńbek etýden úmiti bar adam sportqa beıim bolǵany abzal. Eń bastysy, adam óz eliniń patrıoty ekenin umytpaǵany durys. Barlyq salada jumys isteıtin azamattar sol ustanymdy ilki sátke de sanasynan shyǵarmaýy kerek», deıdi Shymkent qalasy polısııa departamentiniń JQAJ qyzmetkeri Mámet Mámedov.
Voleıbolǵa ańsary aýǵan Mámet Mámedov komandalyq syndaǵy dodalarda 10 márte el chempıony ataǵyn ıelengen. Boıy eki metr bolǵandyqtan voleıboldy bir kisideı myqty oınaıtyny daýsyz. Ol qaı kezde de fızıkalyq jáne fýnksıonaldyq daıyndyqqa aıryqsha nazar aýdarady. Onsyz bári beker ekenin jaqsy biledi.
Iá, qalaı alyp qarasaq ta, jumystyń jeńili bolmaıdy. Ony polısııa qyzmetkerleri bir kisideı túsinedi.
«Jumys qaı kezde de jaýapkershilikti talap etetini aıtpasa da túsinikti. Men bul qyzmetke júrek qalaýymen kelgen adammyn. Eldiń tynyshtyǵyn kúzetetin salada talmaı ter tógý, aıanbaı eńbektený – men úshin maqtanysh ári abyroı. Rasynda da, qoǵamdyq qaýipsizdikti qamtamasyz etýdiń jaýapkershiligi orasan zor. Ony túsinemin. Barlyq qıyndyqty eńsere júrip, otbasyma aıryqsha kóńil bólemin. Áriptester táýliktiń kez kelgen ýaqytynda shaqyrtýlarǵa daıyn turady. О́ıtkeni jumysymyz sondaı. Shıraqtyq, jedeldik, kásibılikti talap etedi. Álbette, barlyq jumystyń ózine tán qıyndyǵy bolatyny daýsyz. Adam balasy sol aýyrtpashylyqtarǵa tózgende ǵana eńbeginiń ónbegin kóredi. Rasynda da, jasaq qyzmetkerlerine qoıylatyn talaptyń qatań ekeni ras. Alaıda sol qatań talap bizdi sharbolattaı shıryqtyratynyn da umytpaǵan jón», deıdi Ashat Úsipbekov.
Jýyrda ǵana 31 jasqa tolǵan Nurjan Bekzatov bylǵary qolǵap sheberi retinde de talaı bıikterdi baǵyndyrǵan. Jumysyn tııanaqty atqaratyn ol sporttan múlde alystaǵan emes. О́ıtkeni polısııa qyzmetkeri qaı kezde de babynda bolýy kerektigin sezinedi.
«Bizde jumys ýaqyty tańǵy saptyq jıynnan bastalady. Jumys kestesine sáıkes sporttyq is-sharalarǵa qatysamyz. Iаǵnı úzdiksiz dene jattyǵýlaryn jasap turamyz. Kún saıyn túski saǵat 14:30-dan bastap daıarlyq sabaqtaryn ótkizemiz. Al 17:00-den 19:00-ge deıin kúres tásilderinen sabaq ótemiz. Boıym eki metrge jaqyn. Boks udaıy sporttyq babymda júrýime tikeleı áser etedi. Bastapqydaǵy qyzyǵýshylyǵym keıin kásibı kózqaraspen úılesim tapty. Sodan da bolsa kerek, aýyz toltyryp aıtarlyqtaı jetistikterge qol jetkizdim.
2013-2016 jyldar aralyǵynda Qazaqstan birinshiliginiń kúmis júldegeri atandym. 2017 jyly 3-oryn buıyrdy. Odan soń Kýbada ótken «Dostyq» halyqaralyq jarysynyń jeńimpazy boldym jáne Prezıdent kýbogy dodasynda fınalǵa deıin jettim. Qazaqstanda IIO qyzmetkerleri arasynda ótken qoıan-qoltyq urystan chempıon atandym. Ulttyq ulan Bas qolbasshysynyń Kýbogyna ótkizilgen týrnırdiń fınalyna deıin jettim. Qyzmetim, sportqa degen yntam meni árdaıym alǵa jeteleıdi. Qaı kezde de Otan aldyndaǵy antqa adal bolý kerektigin qaperimnen shyǵarmaımyn. О́ıtkeni baıtaq dalanyń tynyshtyǵyn saqtaý, Otandy qorǵaý – barshamyzdyń qasıetti boryshymyz», deıdi ol.
Rasynda da, jyldam qımyldaıtyn arnaıy jasaq jaýyngerleriniń qoǵamdaǵy orny erekshe ekeni talas týdyrmasa kerek. Qoǵamdyq tynyshtyqqa qaýip tóngen kezde aldymen dál osy jumysty atqaryp júrgen azamattar oqıǵa ornyna jedel jetedi. Kóptiń aldynda júrip eńbek etkenderine qaramastan, qoǵam tarapynan olardyń jumysy kóp elene bermeıdi. Biraq sala qyzmetkerleri oǵan bas aýyrtpaıdy. Olar úshin eń bastysy – qoǵamnyń tynyshtyǵy, azamattardyń quqyǵynyń qorǵalýy mańyzdy.
Aqmaral MAHANBETÁLI,
jýrnalıst
