Qabyldaý ashyq formatta ótti. Kásipkerler bıznes-ombýdsmenge normatıvtik-quqyqtyq aktilerdiń saqtalmaýyna, ondaǵy olqylyqtarǵa qatysty shaǵymdandy.
Aıtalyq, «Maslo-Del» JShS dırektory Pavel Selıvanov SES organdarynyń áreketine shaǵymdandy. Kásipkerdiń aıtýynsha, olar aıyppul salady jáne transızomerleri bar maı ónimderin óndiristen alyp tastaýdy talap etedi. Máselen, maıda transızomerler 2%-dan artyq bolsa, SES organdary birden shara qoldanady. Qazaqstan qol qoıǵan Qazaqstan Respýblıkasy aýmaǵynda Reseı Federasııasy jáne Belarýs Respýblıkasy standarttaryn engizý týraly buıryqtar shara qoldanýǵa birden-bir sebep bolyp tur. Bul standarttar ónimderdegi tabıǵı komponentterdi eskermeıdi. Onyń ústine olar (RF Memlekettik standarty) reseılik jáne belarýstyq óndirýshilerdiń talaptaryna jáne olardyń óndiristik múmkindikterine, jabdyqtaryna arnalǵan. Sonymen qatar halyqaralyq jáne óńirlik standarttar memleketaralyq nemese memlekettik standarttar retinde qabyldanǵannan keıin qoldanylady. Iаǵnı Qazaqstanda maı ónimderinde tabıǵı transızomerlerdiń bolýyn jáne ony zerthanalarda zertteýdi irikteýdiń basqa da erekshelikterin eskeretin óziniń ulttyq standarttaryn qabyldaý múmkindigi boldy jáne bar. Biraq áli kúnge elimizde Ulttyq standarttar belgilenbegen.
«Osyǵan qaramastan, SES organdary men olardyń laýazymdy tulǵalary hattama jasap, kóp mólsherde (5 mln teńge) aıyppul jáne óndiriske tyıym salady. Olardyń aıtýynsha, joǵaryda atalǵan Reseı Federasııasynyń memlekettik standarttary men Belarýs Respýblıkasynyń memlekettik standarttary talaptaryna sáıkes kelmeıdi-mis. Osylaısha, transızomerlerdi paıdalanýǵa tyıym sala otyryp, palma maıyn qoldanýǵa ıtermeleıdi», dep narazylyqtaryn bildirdi kásipkerler.
«Qazir jaýap berý qıyn. Kelesi aptada sizderdiń sarapshylaryńyzben kezdesip, bul máseleni tolyǵyraq talqylaıyq. Muqııat taldaý qajet. Kásipkerlik jónindegi ýákiletti organǵa kásipkerlik sýbektileriniń shaǵymdary boıynsha qoldanystaǵy rettegish quraldar men talaptardy joıý nemese qaıta qaraý boıynsha usynystar engizýge quqyǵym bar», dedi R.Júrsinov.
Kásipkerler júgingen taǵy bir másele normatıvtik-quqyqtyq aktilerge baılanysty. 2022 jylǵy qańtardaǵy tártipsizdikter nátıjesinde ShOB sýbektilerine keltirilgen múliktik zııandy óteý qaǵıdalaryna sáıkes iri bıznes sýbektileri zalaldy óteýge ótinish bere almaıdy. Osyǵan baılanysty «Magnum Cash&Carry» JShS óziniń taýar jetkizýshilerine fors-majorlyq jaǵdaılarǵa baılanysty joǵalǵan taýar úshin tólem júrgizbeıtini týraly habarlama jiberdi. Al memleket esebinen óteý múmkin emes, sebebi kompanııa iri bıznes sýbektisi bolyp sanalady. Saıyp kelgende, shaǵyn bıznes shyǵynǵa ushyraıdy. Osyndaı máselemen bıznes-ombýdsmenge «LIRUMAX» JShS júgindi.
«Ablı-Qurylys» JShS ókili múlikti, atap aıtqanda, Double tree by Hilton Almaty qonaqúı keshenin reıderlik basyp alý týraly aıtty. Alaıaqtyq shema boıynsha múlikti tómendetilgen baǵamen satý arqyly asa iri zalal keltirilgen. JShS ókili múlikti basyp alý prosesine qatysatyn bir kúndik kompanııalarda asa iri mólsherdegi alaıaqtyq shemalar men aqsha qarajatynyń aınalymy faktileri anyq bolǵan jaǵdaıda quqyq qorǵaý organdarynyń qylmystyq is qozǵaý jáne sotqa deıingi tergep-tekserý júrgizý bóligindegi áreketsizdigine shaǵymdandy.
Bıznes-ombýdsmen kásipkerlerdiń máselelerin tyńdap, barlyq másele qaralyp, baqylaýǵa alynatynyn habarlady.
Almaty qalasy Kásipkerler palatasynyń dırektory Aıtýar Qoshmambetov kásipkerlermen jeke kezdesýlerdiń mańyzdylyǵyn atap ótti.
«Kásipkerlermen osyndaı formatta kezdesý óte tıimdi. Olar suraq qoıyp, naqty jaýap alady. Almaty qalasynyń kásipkerler palatasy atynan Rýstam Manarbekulyna kásipkerlermen syndarly dıalog qurǵany úshin alǵys aıtamyn», dedi A.Qoshmambetov.
Kásipkerlerdiń jeke qabyldaýynan keıin memlekettik organdar men bıznes sýbektileri ókilderiniń qatysýymen kezdesý ótti, onda óńirdegi bıznestiń ózekti máseleleri talqylandy.
