Jýyrda úsh jyl boıy Prezıdent bastamashyl bolǵan saıası reformalardy odan ári júzege asyrýǵa atsalysty. Azamattyq qoǵam ókilderi, belsendiler, depýtattardyń muryndyq bolýymen Keńes reformalarǵa qatysty óz ustanymdary men usynystaryn ótkizdi. Nátıjesinde, saıası partııalar, beıbit sherýler ótkizý týraly jáne basqa da áleýmettik saıası máselelerge baılanysty zańdarǵa ózgerister engizildi. Sonymen qatar Prezıdenttiń saıası reformalarynyń tórt paketi júzege asty. Bul elimizdegi saıası lıberalızasııa men demokratııalyq bastamalardyń iske asýyna óz úlesin qosty.
Ulttyq quryltaıdyń qurylýyn Ulttyq qoǵamdyq senim keńesi aıasynyń keńeıýi dep qabyldaǵan jón. Munda Prezıdent eń aldymen, qoǵamnyń ár salasyndaǵy bilikti mamandardy, ǵalymdar, jýrnalıster, azamattyq qoǵam belsendileri, aımaqtardaǵy qoǵamdyq keńes múshelerin shaqyrý arqyly jalpyulttyq dıalog alańyna aınaldyrýdy kózdedi. Elimizdegi túrli salada qordalanǵan máselelerdi talqylaý aldaǵy ýaqytta Prezıdenttiń referendýmnan keıingi saıası reformalarynyń odan ári jalǵasyn tabýyna septesedi.
Ulttyq quryltaıdyń basty maqsaty – qoǵamdyq sananyń ózgerýi. Ideologııa máselesi de nazardan tys qalmaq emes. Sondaı-aq ulttyq biregeılikti qalyptastyrýdaǵy bastamalardy talqylaýǵa arnalǵan jalpyulttyq ortalyqqa aınalmaq.
Birinshi otyrysta Memleket basshysy elimizdegi qandaı qundylyqtardy dáripteý kerek jáne qandaı baǵytta jumys isteý qajet degen máselege qatysty óz oıyn ortaǵa saldy. Ásirese eńbekke baýlý, tárbıe máselesine nazar aýdaryldy. Bul quryltaıdyń jıyrmasynshy ǵasyrdyń basyndaǵy Alash ardaqtylarynyń quryltaıymen tarıhı sabaqtastyǵy bar ekenin de atap ótti.
Áleýmettik másele qaı kezde de mańyzdy bolǵanymen, qazirgi tańda rýhanııat máselesiniń máni zor ekenin de umytpaǵan lázim. Sol turǵydan alyp qaraǵanda jańa paradıgmalar, qoǵamdyq sana men qoǵamdyq qundylyqtardyń jańa bir tujyrymdamasy qajet. Osyǵan baılanysty Túrkistanda ótetin basqosýda Ulttyq quryltaı múshelerinen naqty bir salalar boıynsha usynystar túsýi kerek. Nátıjesinde, ulttyq biregeılik pen ulttyq qundylyqtardy odan ári qaraı dáripteý men damytýdyń tyń baǵdary anyqtalýǵa tıis.
Qazbek MAIGELDINOV,
«Qazaqstandyq qoǵamdyq damý ınstıtýtynyń» basqarma tóraǵasy,
saıasattanýshy
