Jalpy kásibı merekelerdi ótkizýdiń qatyp qalǵan qaǵıdaty bar. Quttyqtaý sharalarynyń kóbi resmı formatta ótip, lebiz bildirý, Alǵyshat berýmen shekteledi. Al elordadaǵy fızıka-matematıka baǵytyndaǵy NIS-te ótken is-shara erekshe ráýishte ótti.
Jýrnalısterdi qarsy alǵan osy baǵyttaǵy mekteptiń dırektory Meıram Jakenov: «Jýrnalıst – qyzyǵy men qıyndyǵy qatar júretin, jaýapkershiligi úlken mamandyq. Tórtinshi bılik ókilderi qashan da – qoǵamnyń úni ári aınasy. Álbette, aqparat maıdanynda júrý, jańalyq taratý ońaı sharýa emes. Búginge deıin sizder bizdiń eleń etkizerlik oqıǵalarymyzdy elge jetkizip, sol arqyly zııatkerlik mektepterine, shákirtterimizge qoldaý kórsetip keldińizder. Osy joly sizderdi jumys istep, jazý úshin emes, merekelik kóńil kúıdi sezinip, bir sát rýhanı demalsyn dep arnaıy shaqyryp otyrmyz», deı kele aqparat salasynyń ókilderine jyly lebizin bildirdi.
Rasymen is-sharaǵa shaqyrylǵan ár jýrnalıst medıamarafonnyń shyn peıilmen, usaq-túıegine deıin oılastyrylyp jasalǵanyna kýá boldy. Aldymen Meıram Ámirjanuly bastaǵan ujym jýrnalısterge fızıka-matematıka baǵytyndaǵy mekteptiń tájirıbelik zerthanalarymen, ártúrli úıirme, seksııalarymen tanystyrdy. Mundaǵy ustazdardyń sheberlik dáristerine jýrnalısterdiń ózderi de qatysyp, biraz salanyń ishki álemine úńildi.
Medıamarafonnyń alǵashqy sheberlik sabaǵy kóneden kele jatqan kásip túri – qysh ónerimen tanysýdan bastaldy. Qosymsha bilim berý pedagogi Asan Boronchınov qalam ustaǵan qaýymǵa saz balshyqtan qumyra, tostaǵan, tabaq, tipti sazsyrnaı jasaýdyń qyr-syryn kórsetti. Qyzyq bizdiń qolymyzǵa nebári 300 gramdyq saz ustatqanda bastaldy. Ony ıleýdiń ózi kúsh eken. Durys ılenbese, istegeli turǵan «ǵajaıyp» týyndyńnyń pishini durys shyqpaıtyny bylaı tursyn, kepkende úgitilip synyp ketedi. Odan keıin ıi qanǵan sazdy úzdiksiz aınalyp turǵan qumyrashy sheńberdiń ortasyna dáldep japsyrý, odan qalaǵan pishindi jasap shyǵarý ájeptáýir kúsh-jiger men sheberlikti qajet etedi eken. Keramıst-sheber goncharlyq óner bir kúnde úırenetin is emes ekenin, oǵan biraz ýaqyt qajet ekenin túsindirdi.
Budan keıin «Sheber-Art» sheberlik sabaǵy ótip, onda jýrnalıster óner pániniń oqytýshysy Altyn Erǵazınamen birge, ekologııalyq sómkelerge trafarettiń kómegimen túrli sýret salýǵa mashyqtandy.
Al qosymsha bilim berý pedagogi Saltanat Omarovanyń «Art-Dızaın» dárisinde qatysýshylar fetrden ulttyq naqyshtaǵy shaǵyn sómke jasaýdy úırenip, olardy túrli áshekeılermen bezendirdi.
О́ner pániniń muǵalimi Orazbek Eshanovtyń da sabaǵy taǵylymdy boldy. Qalam ustaǵan qaýym aǵashtan besik jasaýdy úırenip, daıyn bólshekterdi qurastyrdy. Sheber ustaz besiktiń qadir-qasıetin túsindirip, atadan balaǵa mura bolyp kele jatqan qundylyǵymyz ár qazaqtyń tórinde turýǵa tıis ekenin aıtty.
Esterińizde bolsa, osy fızıka-matematıka baǵytyndaǵy zııatkerlik mektebiniń 2021-2022 oqý jyly dombyra sabaǵymen aıaqtalyp, myńnan astam oqýshy elimizdiń eńbek sińirgen mádenıet qaıratkeri Aıtjan Toqtaǵannyń jetekshiligimen qazaqtyń kúılerin dombyramen kúmbirletken edi. Osynsha oqýshynyń birmezgilde ulttyq mýzykalyq aspapta oınaýy «eń aýqymdy dombyra sabaǵy» retinde tirkelip, Gınnestiń rekordtar kitabyna enýge úmitker bolyp otyr. Mine, osyndaı myqty ustazdyń aldyn jýrnalıster de kórip, A.Toqtaǵannan qazaqtyń «Erkem-aı» ánin dombyrada oınaýdy meńgerdi.
Jalpy, NIS-te dástúrli oqý úrdisimen qatar, ulttyq qundylyqtarǵa, qazaqtyń ejelgi qolóner túrlerine de erekshe kóńil bólinetini baıqaldy.
