27 mamyr kúni nashaqorlyqqa qarsy aılyqtyń ashylý is-sharasynda Úkimet basshysynyń orynbasary Eraly Toǵjanov mańyzdy mindetterdi atap ótti. Sońynan jýrnalıster men blogerlerge arnalǵan «Jastar arasyndaǵy nashaqorlyq profılaktıkasynyń zamanaýı aspektileri» degen taqyrypta semınar-trenıng uıymdastyrylyp, 150 qatysýshyǵa sertıfıkat tabystalǵan bolatyn.
Bul is-shara 26 maýsym Halyqaralyq nashaqorlyqqa qarsy kúres kúnine oraılastyrylǵan. Osydan 35 jyl buryn, ıaǵnı 1987 jyldyń 26 maýsymynda BUU Bas Assambleıasynyń sheshimimen bul kún nashaqorlyqtyń jahandyq qaýip-qaterin tanı otyryp, esirtkisiz qoǵam qurý týraly sheshimdi atap kórsetý úshin belgilengen edi.
Birikken Ulttar Uıymynyń málimetteri boıynsha, sońǵy 10 jylda esirtkige táýeldi adamdardyń sany 22 paıyzǵa ósken. Álemde shamamen 275 mıllıon nashaqor adam bar. Esirtki jyl saıyn 500 myńnan astam adamnyń ólimine sebepshi bolyp otyr.
19 mıllıon halqy bar Qazaqstan úshin esirtkige elitýdiń kórsetkishteri ulttyq qaýipsizdikke aıtarlyqtaı qater tóndiredi.
«Densaýlyq saqtaý mınıstrliginiń málimetterine súıensek, elimizde 18,5 myńnan astam nashaqor tirkeýde tur, onyń ishinde 1,5 myńy áıel, sondaı-aq 94 jasóspirim tizimge engen. Biraq bul naqty tirkeýde turǵandardyń sany, al shyn ahýalǵa keletin bolsaq, naýqastar sany budan birneshe esege asyp ketedi», dedi Ishki ister mınıstrligi Esirtki qylmysyna qarsy is-qımyl departamentiniń basqarma basshysy Baqytjan Ábdirahmanov.
Mınıstrlik ókiliniń aıtýynsha, esirtkige táýeldilikti joıý maqsatynda quzyrly organdardyń birlese eńbek etýiniń arqasynda kóptegen aýqymdy is-shara atqarylǵan. Atap aıtqanda, el kóleminde «Esirtkige táýeldilik, jas aıyrmashylyqtary, jynystyq erekshelikteri» taqyrybynda oqý semınary, esirtki jáne psıhoaktıvti zattardy satýdyń jáne medısınalyq emes maqsatta tutynýdyń jolyn kesý jónindegi sharalardy qabyldamaǵany úshin jaýapkershilik máselesi týraly kóńil kóterý oryndary men túngi klýbtardyń basshylarymen kezdesýler uıymdastyrylǵan. Sondaı-aq «Esirtkige qarsy nasıhat», «Esirtki qylmysy úshin jaýapkershilik» býkletterin, jadynamalaryn taratý, otbasy qundylyqtaryn damytý úshin balalardy kıno, mýzeıge, teatrlarǵa jáne basqa da mádenıet oryndaryna aparý, mektepter, kolledjderdiń oqýshylary úshin balalardyń tikeleı qatysýymen qyzmettik ıtterdiń múmkindikterin kórsete otyryp, «Esirtkisiz salamatty bolashaqqa birge» kınologııalyq ortalyqtaryna ekskýrsııa jáne taǵy basqa sporttyq-mádenı is-sharalar udaıy ótkizilip keledi. Bul baǵyttaǵy jumystar aldaǵy ýaqytta da jalǵasyn taba bermek.
