Qalalyq arhıv pen «Astana» halyqaralyq ýnıversıtetiniń arasynda jasalǵan kelisim negizinde tarıh fakýltetiniń stýdentteri oqý óndiristik tájirıbeden ótip júr. Ctýdentter tájirıbe alý barysynda arhıv jumysymen tolyqtaı tanysyp, jańa restavrasııa qurylǵylarymen qalaı jumys isteý kerektigin úırendi. Sondaı-aq qujattardy saqtaý jáne paıdalaný boıynsha maǵlumat aldy.
Atap aıtqanda, memlekettik saqtaýǵa alynǵan qujattardyń jaı-kúıin tekserý, ornalasý tártibi, suranysqa ıe qujattardy berý, sıfrlandyrý men qaıta qalpyna keltirý jumystary boıynsha tájirıbeli mamandar dáris oqyp, sheberlik sabaqtaryn ótkizdi. Mekeme dırektory Meıram Bektembaev bul ıigilikti is arhıv salasyna jastardyń qyzyǵýshylyǵyn oıatatynyna senimdi.
«Muraǵat qyzmetkerleriniń atqarar sharýasy ońaı emes. Qujattardy qaıta qalpyna keltirý úshin kóptegen mamanǵa zárýmiz. Bul máseleni sheshý úshin bilikti stýdentterdi osy salaǵa tartý qajet. Shejireli derektermen jumys isteý shyǵarmashylyqpen aınalysatyn adamdarǵa shabyt beredi. Qart tarıhtyń qazynasyna jolyǵasyz. Bul rýhanı ósýdiń kepili. Jas mamandardy daıarlaý arqyly arhıv salasy ilgerleıtini anyq», deıdi M.Bektembaev.
Stýdentter tájirıbe barysynda arhıv salalaryn qamtıtyn birneshe bólimge bólindi. Bolashaq jas mamandar berilgen jumysqa belsendi qatysyp, arhıv qujattarymen jumys isteýge múmkindik aldy. Tájirıbe alýshylar arhıv qyzmetkerlerine qujattardy saqtaý jáne paıdalaný aspektileri boıynsha suraqtar qoıyp, túrli maǵlumatqa qanyqty.
Bul tájirıbe stýdentterdiń óz biliktiligin arttyrýǵa, jańa tehnologııalar men arhıv jumysyndaǵy zamanaýı ádistermen tanysýǵa baǵyttaldy.
