Nemis Rozemarı Kraýze Astanada Qorqyt kúılerin oınady

ASTANA. 25 sáýir. Germanııa turǵyny, nemis Rozemarı Kraýze degen áıel Astanaǵa arnaıy kelip, Qorqyt kúılerin tartyp, kórermenniń kózaıymyna aınaldy. Bul týraly egemen.kz tilshisi habarlady. Endi biz Rozemarıdiń qobyzdy janyna qalaı serik etkeni jóninde az-kem toqtalaıyq. О́nerge úsh qaınasa sorpasy qosylmaıtyn mamandyq ıesi  – psıholog-dáriger Rozemarı osydan birneshe jyl buryn óz elinde ǵaıyptan taıyp, qulaqqa jaǵymdy, júrek shymyrlatar keremet bir áýezdi qulaǵy shalyp qalady. Sodan bastap onyń mazasy ketedi. Álgi áýen qandaı aspappen oryndalǵanyn bilýge qansha talpynsa da, maqsatyna jete almaı, áýrelenedi. Qolyn bir siltep qoıa salaıyn dese, ishki saraıy tynyshyn alyp, sezimin serpiltken jańaǵy áýendi qaıta tyńdaýǵa úndeýin doǵara qoımaıdy.

Sóıtip júrgende, 2012 jyly Avstrııanyń Gras qalasynda qylqobyzshy, halyqaralyq, respýblıkalyq baıqaýlardyń laýreaty, Qazaqstannyń mádenıet qaıratkeri Raýshan Orazbaeva qyzy Toǵjanmen birge qobyz kúılerinen konsert beredi. Osy sharanyń ótetinin aldyn ala estigen, jatjurttyqtardyń konserti bolady degen habarlarǵa birazdan beri qulaǵyn túrip júrýdi ádetke aınaldyrǵan Rozemarı izdegenin sol jerden tabatyndaı, barlyq sharýasyn ysyryp qoıyp, Gras qalasyna jetedi. Sóıtse, bosqa áýre bolmapty. Jany elegize izdegen áýenin álgi konsertten taýyp, kóńili jaılanady. Qobyz únin qumarta tyńdap, rýhanı serpilip qalǵan nemis áıeli konsertten keıin Raýshan Orazbaevaǵa jata kelip, jabysady. Tilegi – qobyz tartýdy úırený. Ol Raýshanǵa: «Qobyz tartýdy úırengim keledi, onyń úni meniń júregimdi qozǵady, kóńilimdi terbetti», – deıdi. Beıtanys eýropalyq áıeldiń qazaqtyń qasıetti qobyzyna asyq bolǵanyna qýanǵan Raýshan Orazbaeva Rozemarıdiń ótinishin qabyldaıdy. Sodan bastap Rozemarı qobyzshy qyzdyń talapty shákirti bolyp shyǵa keledi.

Raýshan Orazbaeva nemis áıeline qobyz úıretýin alǵash jolyqqan sátten bastap ketedi. Keıinnen Rozemarı qobyz tartýdy meńgere túsý úshin Raýshan Orazbaevany Almatyǵa izdep keledi. Ne degen qumarlyq deseńizshi! Endi ony qazaqtyń kıeli qońyr qobyzy Astanaǵa jetektep ákeldi. Raýshan Orazbaeva: «Rozemarıge dám-tuz buıyryp, Astanaǵa joly tústi. Munda ol meniń «Aqqý» atty shyǵarmashylyq keshime qatysty. Ol kórermender qatarynda otyrǵan joq. Bizben birge, ıaǵnı, óz shákirtterimnen quralǵan ansambl quramynda Qorqyt atamyzdyń kúılerin tartty», – dedi. Joldybaı Bazar. Derekkóz: egemen.kz. Foto: Orynbaı Balmurat.