Senator áriptesterin atbasarlyqtarǵa kómek kórsetýge shaqyrdy

ASTANA. 25 sáýir. Parlament Senatynyń depýtaty Svetlana Jalmaǵambetova áriptesterin Atbasardaǵy sý tasqynynan zardap shekkenderge bir kúndik eńbekaqylaryn aýdarýǵa úndedi. Bul týraly «31 arna» habarlady. Buǵan deıin belgili bolǵandaı, bıýdjetten sý astynda qalǵandarǵa bir rettik járdemaqy berilgen. Alaıda, onyń mólsheri mardymsyz, nebári 46 myń teńge. Osy derekti alǵa tartqan senator Svetlana Jalmaǵambetova sý astynda qalǵan óńirge qosymsha 2,4 mıllıard teńge bólý kerektigin aıtty. Keıingi derekterge qaraǵanda, Atbasar qalasy men 4 aýyldaǵy 500-ge tarta úı sýǵa ketken. 18 kóshe buzylǵan. 1,5 myń turǵyn bar múlkinen aıyrylǵan. Buǵan qosymsha, arnaıy tekserý barysynda 164 baspananyń turýǵa jaramsyzdyǵy anyqtaldy. Sondaı-aq, 1 mektep pen 307 úıge shuǵyl jóndeý jumystaryn júrgizý kerek. Parlament Senatynyń kezekti otyrysynda Svetlana Jalmaǵambetova: «Aldaǵy ýaqytta osyndaı zardaptar bolmaýy úshin taǵy da sharalar qoldaný kerek. Onyń ishinde kópirdi jóndeý kerek. Onyń ishinde sý bógetterin salý kerek. Osylardyń bárine 2,5 mıllıardtaı qarajat kerek», – dedi. Joldybaı Bazar. Derekkóz: «31 arna». Foto: newskaz.kz.