Qazaqstannyń úshinshi jer serigi ǵaryshqa ushady dep kútilýde

ASTANA. 25 sáýir. Zymyran tasyǵysh «Proton-M» men elimizdiń «QazSat-3» jáne Reseıdiń «Lých-5V» apparattary Baıqońyr ǵarysh aılaǵynyń ushyrý keshenine jetkizildi. Bul týraly Aviation Explorer. ru habarlady. 28 sáýirde Astana ýaqytymen saǵat 8:25-te «Proton-M» zymyran tasyǵyshy «QazSat-3» jáne «Lých-5V» ǵaryshtyq apparattaryn kókke alyp ushady. Esterińizge salar bolsaq, «Respýblıkalyq ǵaryshtyq baılanys ortalyǵy» Aksıonerlik qoǵamynyń tapsyrysymen jasalǵan «QazSat-3» 2014 jylǵy 24 naýryzda Reseıdiń Krasnoıarsk qalasynan Baıqońyr ǵarysh aılaǵyna jetkizilgen bolatyn. Osy jerde salmaǵy 2 tonnaǵa jýyq ǵaryshtyq apparatty sońǵy ret tekserýden ótkizip, ushyrýǵa daıyndady. Mamandardyń aıtýynsha, «QazSat-3» «QazSat-2-ge» qaraǵanda birqatar sıpattamasy jáne orbıtalyq núktesi jaqsy kórinedi. Atalyp otyrǵan jer serigi Reseıdiń Reshetnev atyndaǵy aqparattyq jer serigi júıeleri kompanııasynda 3 jyl boıy qurastyryldy. Sodan keıin Qazaqstan tarapyna onyń qajetti synaqtan ótip, ushyrýǵa daıyn ekendigi habarlanyp jáne tıisti tehnıkalyq qujattary usynyldy. «Respýblıkalyq ǵaryshtyq baılanys ortalaǵy» mamandarynyń aıtýynsha, atalǵan apparattyń 15 jyldaı jumys isteýge múmkindigi bar eken. Eger «QazSat-3» jumysyn sátti bastasa, kóktegi «QazSat-2» jer serigimen birlese qyzmet kórsetpek. Bul ekeýiniń arqasynda otandyq telekommýnıkasııa júıesiniń senimdiligi artady. Sonymen birge, sheteldik ǵarysh salasy kompanııalaryna júginýimiz azaıa túspek. Árıne, mundaı jobalar Qazaqstannyń bedelin kóterip, damyǵan otyz eldiń qataryna kirýimizge óz úlesin qosatyny belgili. Taǵy bir erekshe toqtala keter jáıt, eger «QazSat-3» kózdelgen jerine jetkizilse, otandyq eki birdeı jer serigi elimizdiń aýmaǵynan basqarylmaq. Sońǵy 10 jyl kóleminde ǵarysh salasy boıynsha atqarylǵan jumystar óte kóp. Sonyń nátıjesinde Qazaqstan ǵaryshtyq tehnologııalary jetilgen memleketterdiń qataryna qosyldy. Joldybaı Bazar. Derekkóz: Aviation Explorer. ru. Foto: Gazeta.kz.