Keńeste Qorǵanys mınıstri, general-polkovnık Rýslan Jaqsylyqov áskerı qyzmettiń qaýipsizdigin qamtamasyz etýdiń mańyzdylyǵyna nazar aýdaryp, Memleket basshysy Qasym-Jomart Toqaevtyń tapsyrmasy aıasynda Qarýly Kúshterde qabyldanyp jatqan sharalar týraly habardar etti.
Ol qorǵanys vedomstvosynyń bastamasy boıynsha orny tolmas shyǵyndardy azaıtý, sýısıdterdiń aldyn alý jáne azamattar men qoǵamnyń armııaǵa degen senimin arttyrýǵa jaǵdaı jasaý baǵdarlamasyn ázirleý boıynsha jumys toby qurylǵanyn habarlady. Qujatty daıyndaýǵa ǵylym, quqyq qorǵaý organdary men úkimettik emes uıymdardyń ókilderi tartylatyn bolady.
Úılestirý keńesiniń otyrysyna Bas áskerı prokýratýra, Qorǵanys mınıstrligi, Tótenshe jaǵdaılar mınıstrligi, Memlekettik kúzet qyzmeti, Shekara qyzmeti, Ulttyq ulan basshylyǵy, Indýstrııa jáne ınfraqurylymdyq damý mınıstrligi, atqarýshy, quqyq qorǵaý jáne arnaıy memlekettik organdardyń ókilderi qatysty.
Qarýly Kúshterdiń arsenaldary men qoımalarynda qarý-jaraqty, oq-dáriler men jarylǵysh zattardy saqtaý máselesin qaraý kezinde qoımalar men áskerı ınfraqurylymnyń, órt qaýipsizdigi men dıversııaǵa qarsy qorǵanystyń jaı-kúıiniń zor mańyzy bar ekeni atap ótildi. Osyǵan baılanysty oq-dáriler men qarý-jaraqtyń tıisinshe saqtalmaýyna baılanysty tótenshe oqıǵalardyń aldyn alý jóninde keshendi is-sharalar qabyldaý qajettigi týraly málimdeldi.
Qorǵanys vedomstvosy «Qaýipsiz el» ulttyq jobasyn iske asyrýda. Búginde oq-dárilerdi saqtaý obektilerin salý boıynsha jumystar júrgizilip, tehnıkalyq jáne uıymdastyrýshylyq sıpattaǵy basqa da sharalar qabyldanyp jatyr.
Otyrys barysynda áskerı qyzmetshiler arasynda qol jumsaý jáne jarǵydan tys ózara qarym-qatynas, jeke quramnyń jaraqattanýy men qaza bolýy faktileriniń aldyn alý jónindegi jumystardy kúsheıtý qajettigine nazar aýdaryldy.
Otyrysta Qazaqstan Respýblıkasynyń Qarýly Kúshterinde, basqa da áskerleri men áskerı quralymdarynda quqyq buzýshylyqtyń aldyn alýdyń 2022-2024 jyldarǵa arnalǵan qoldanystaǵy baǵdarlamasyn damytý maqsatynda birqatar shara usynyldy. Aldyn alýdyń pármendi quraly áskerı bólimderdiń aýmaǵy men úı-jaılaryn beınebaqylaýmen barynsha qamtý jáne quqyq buzýshylyqtyń aldyn alý salasyndaǵy basqa da zańnamalyq is-sharalardy pysyqtaý bolmaq.
Áskerge shaqyrylýshylardyń, sarbazdardyń, olardyń ata-analarynyń, sondaı-aq ardagerler men qaza tapqan áskerı qyzmetshilerdiń otbasylarynyń quqyqtaryn qorǵaý salasynda qoǵamdyq keńes qurý máselesi qaraldy. Áskerdegi oqıǵalar týraly qoǵam men halyqty aqparattandyrýdyń biryńǵaı algorıtmin qabyldaý qajettiligi aıtyldy. Bul is-sharalar qoǵamnyń armııaǵa degen senimin arttyrýǵa jáne onyń bedelin kóterýge oń yqpal etedi.
Áskerı ujymdarda salamatty ahýaldy qalyptastyrý, áskerı qyzmetshilerdiń orny tolmas shyǵyndaryn azaıtý bilim berý qurylymdarynyń, psıhologter men quqyq qorǵaý organdarynyń laýazymdy tulǵalary qyzmetiniń mańyzdy basymdyǵy retinde qarastyrylady.
