Doda erejesine sáıkes sáýir-mamyr aılarynda aýyl, aýdan, oblystyq (qalalyq) deńgeıdegi jáne kúshtik qurylymdar jelisi arasynda irikteý jarystary tolyǵymen ótip, oǵan elimiz boıynsha bes myńǵa jýyq sportshy qatysty. Sonyń ishinen 36 balýan aqtyq synǵa joldama aldy.
Olardyń ishinde osyǵan deıin jeńis tuǵyrynan kóringen Muhıt Tursynov, Elaman Erǵalıev, Erasyl Qajybaev, Ǵalymjan Qyryqbaev bar. Budan buryn ótken jyldyń jeńimpazy Dáýren Nuralınov jaraqatyna baılanysty týrnırge qatyspaıtynyn málimdegen edi. Al eki dúrkin «Qazaqstan Barysy» atanǵan Aıbek Nuǵymarov sporttyq jolyn aıaqtaǵanyn jarııalady.
Týrnırdi Mádenıet jáne sport mınıstriligi jáne Nur-Sultan qalasy ákimdiginiń qoldaýymen «Qazaqstan Barysy» qory men Qazaq kuresi Assosıasııasy uıymdastyrady.
Qazaq kúresi erejesine engizilgen ózgertýlerge baılanysty bıylǵy týrnır «búk» upaıynsyz ótedi.
«Qazaqstan Barysy» týrnıri aıasynda jeńimpaz atanǵan balýanǵa 25 000 000 teńge, altyn belbeý men aýyspaly altyn «taıtuıaq» tabystalady. Ekinshi orynǵa 5 500 000 teńge jáne úshinshi orynǵa 1 800 000 teńge, sáıkesinshe kúmis jáne qola belbeýlermen marapattalady.
Týrnır Qazsport arnalary arqyly tikeleı efırden kórsetiledi.
