EnergyProm portalynyń málimetinshe, qus etiniń baǵasy mamyr aıynda birden 28,5%-ǵa ósken.
Aıta keteıik, Qazaqstanda et pen qus etiniń baǵasy 6 jyldan asa ýaqyttan beri úzdiksiz ósip keledi.
«Osy jyldyń birinshi toqsanynda Qazaqstanda ortasha eseppen alǵanda, et pen qus etin tutyný jan basyna shaqqanda 11,5 kg qurady. Bul 2021 jyldyń sáıkes kezeńimen salystyrǵanda 5,9%-ǵa artyq kórsetkish», deıdi mamandar.
Sonymen qatar jańa pisken jáne salqyndatylǵan et pen qus etiniń ónimi ósti. Máselen, iri qara mal, shoshqa, qoı, eshki jáne jylqy etin óndirý kólemi bir jylda 10,6 paıyzǵa artsa, bıylǵy bes aıda 30,1 myń tonnany qurady. О́z kezeginde qus etin óndirý 5,6 paıyzǵa artyp, 46,4 myń tonnany qurady.
«Otandyq et kombınattary men qus fabrıkalarynyń ishki naryqtaǵy suranysy 88,9%-ǵa oryndaldy. О́ndiris 342 myń tonnaǵa jetti, bul ótken jyldyń sáıkes kezeńmen salystyrǵanda 1,9%-ǵa artyq kórsetkish», delingen habarlamada.
Importtyń úlesine resýrstardyń 11,1%-y, sáıkesinshe 42,6 myń tonna ónim tıesili, bul bir jyl burynǵydan 5,7%-ǵa az. Al eksport ótken jylmen salystyrǵanda birden 19,3 paıyzǵa tómendep, 10,3 myń tonnany qurady.
Sonymen ishki naryqta 374,2 myń tonna et jáne et ónimderi satyldy, bul ótken jylmen salystyrǵanda 1,7 paıyzǵa artyq kórsetkish.
